:: KPL :: Lao News Agency

ມື້ນີ ສຳນັກຂ່າວສານປະເທດລາວ (ຂ.ປ.ລ ຫລື KPL) ມີອາຍຸ 39 ປີ (6/1/1968- 6/1/2006) ນັບແຕ່ມື້ ສ້າງຕັ້ງເປັນຕົ້ນມາ ໂດຍໄດ້ຮັບການເອົາໃຈໃສ່ຊີ້ນຳຈາກຂັ້ນເທິງ ສຳນັກງານຂ່າວສານປະເທດລາວ ໄດ້ເຕີບໃຫຍ່ຂະ ຫຍາຍຕົວ ແລະ ສູ້ຊົນເຮັດສຳເລັດຫນ້າທີ່ຂອງຕົນ ໃນການປະກອບສ່ວນເຂົ້າໃນພາລະກິດຕໍ່ສູ້ປົດປ່ອຍຊາດໃນເມື່ອກ່ອນ ກໍຄືພາລະກິດປົກປັກຮັກສາ ແລະ ສ້າງສາປະເທດຊາດ ໃນປະຈຸບັນ.
ໂຄງປະກອບການຈັດຕັ້ງໃນເບື້ອງຕົ້ນ ເປັນພຽງຫນ່ວຍງານຫນຶ່ງທີ່ຕັ້ງຢູ່ເມືອງວຽງໄຊ ແຂວງຫົວພັນ ຊຶ່ງປະ ກອບດ້ວຍພະນັກງານ, ນັກຂ່າວ, ນັກວິຊາການຈຳນວນ 10 ກວ່າຄົນ, ທີ່ເຮັດຫນ້າທີ່ເກັບກຳຂໍ້ມູນ ແລະຂຽນຂ່າວ ສະຫນອງໃຫ້ວິທະຍຸກະຈາຍສຽງຂອງຝ່າຍປະເທດລາວ ແລະຫນັງສືພິມລາວຮັກຊາດ ພ້ອມທັງສົ່ງຂ່າວ ເປັນພາສາອັງກິດ ອອກອາກາດໃນລະບົບກະຈາຍຄື້ນສັ້ນ ເພື່ອຕອບສະຫນອງຄວາມຮຽກຮ້ອງຕ້ອງການ ຂອງການປະຕິວັດ ໃນບາດລ້ຽວສຳຄັນ. ນັບແຕ່ປີ 1973 ເປັນຕົ້ນມາ ສຳນັກຂ່າວສານປະເທດລາວ ໄດ້ເລີ່ມພິມໃບຂ່າວລາຍວັນ ອອກແຈກຢາຍຢູ່ນະຄອນຫລວງວຽງຈັນ ເພື່ອສ່ອງແສງສະຖານະການອັນເຜັດໆຮ້ອນໆ ໃນໄລຍະການເຈລະຈາ, ການເຊັນສັນຍາວຽງຈັນ, ການປະຕິບັດສັນຍາ, ການຈັດຕັ້ງລັດຖະບານປະສົມ ແລະ ຄະນະມົນຕີປະສົມການມືອງແຫ່ງຊາດ ກໍຄືຂະບວນການຕໍ່ສູ້ ລຸກຮື້ຂຶ້ນຢຶດອຳນາດ ຂອງປະຊາຊົນ ໃນທົ່ວປະເທດ. ໃນໄລຍະດຽວກັນນັ້ນ ພາກສ່ວນທີ່ຍັງຢູ່ເມືອງວຽງໄຊ ກໍໄດ້ຈັດພິມໃບຂ່າວຄົ້ນຄວ້າ ເພື່ອສະຫນອງຂໍ້ມູນ ຂ່າວສານ ໃຫ້ແກ່ຂັ້ນນຳຢ່າງເປັນປະຈຳ. ພາຍຫລັງການສະ ຖາປະນາ ສປປ ລາວ ເມື່ອວັນທີ 2 ທັນວາປີ 1975 ເປັນຕົ້ນມາ, ສຳນັກຂ່າວສານປະເທດລາວ ໄດ້ກາຍເປັນແຫລ່ງ ຂ່າວສານທາງການ ຂອງ ສປປ. ລາວ, ເນື້ອໃນ ແລະຮູບການ ກໍໄດ້ຮັບການປັບປຸງໃຫ້ນັບມື້ດີຂຶ້ນ. ນອກຈາກພິມໃບ ຂ່າວເປັນພາສາລາວ ແລະສົ່ງຂ່າວດ້ວຍລະບົບກະຈາຍຄື້ນສັ້ນແລ້ວ ກໍໄດ້ພິມໃບຂ່າວເປັນພາສາຝຣັ່ງ, ພາສາອັງກິດ ລາຍວັນ ອອກຕື່ມອີກຢ່າງເປັນປົກກະຕິ. ແຕ່ປີ 1979 ເຖິງປີ 2000 ກໍໄດ້ພິມວາລະສານປະເທດລາວ ເປັນພາສາລາວ ແລະເປັນພາສາອັງກິດ ອອກຈຳຫນ່າຍ. ນັບແຕ່ 1/1/2001 ເປັນຕົ້ນມາສຳນັກຂ່າວສານປະເທດລາວ ໄດ້ເພີ່ມຜະລິດຕະພັນຂອງຕົນຕື່ມອີກຄື ໄດ້ພິມ ແລະ ຈຳຫນ່າຍ ຫນັງສືພິມປະເທດລາວລາຍວັນອອກຢ່າງເປັນປົກກະຕິຕະຫລອດມາ. ພ້ອມນັ້ນກໍໄດ້ປັບປຸງການພິມໃບຂ່າວ ພາສາຝຣັ່ງ ແລະ ອັງກິດ ມາເປັນຮູບແບບຫນັງສືພິມ ອັນມີສີສັນ ແລະເນື້ອໃນນັບມືອຸດົມສົມບູນ ເພື່ອຕອບສະຫນອງຂໍ້ມູນຂ່າວສານໃຫ້ແກ່ຜູ້ອ່ານ ໄດ້ນັບມືິ້ກວ້າງຂວາງ ແລະທົ່ວເຖິງໃນຂອບເຂດທົ່ວປະເທດ.
ທາງດ້ານຮູບພາບ ສຳນັກຂ່າວສານປະເທດລາວ ໄດ້ກາຍເປັນແຫລ່ງສະສົມຮູບພາບອັນມີຄຸນຄ່າ ນັບທັງໃນໄລຍະຕໍ່ສູ້ປົດປ່ອຍຊາດ ກໍຄືຮູບພາບທີ່ສ່ອງແສງພາລະກິດແຫ່ງການປົກປັກຮັກສາ ແລະ ສ້າງສາປະເທດ ຊຶ່ງໃນໄລ ຍະຜ່ານມາ ໄດ້ພິມໃບຂ່າວພາບ (ປົດສະເຕີ), ປື້ມຮູບພາບ ສປປ. ລາວ ໄດ້ເຂົ້າຮ່ວມ ແລະຈັດງານສະແດງຮູບພາບ ໃນໂອກາດລະນຶກວັນສຳຄັນຂອງຊາດ ພ້ອມນັ້ນກໍໄດ້ສະຫນອງຮູບໃຫ້ແກ່ພາກສ່ວນຕ່າງໆ ນັບທັງຫໍພິພິທະພັນແຫ່ງ ຊາດ ແລະ ຫໍພິພິທະພັນໄກສອນ ພົມວິຫານ; ພື້ນຖານວັດຖຸເຕັກນິກ ຂອງຂ່າວສານໃນເບື້ອງຕົ້ນ ແມ່ນນຳໃຊ້ເຄື່ອງໂທລະເລກ ໃນການຕິດຕໍ່ ແລະຮັບສົ່ງຂ່າວກັບທ້ອງຖິ່ນ. ຮອດປີ 1970 ໄດ້ນຳໃຊ້ເຄື່ອງໂທລະພິມ ລຸ້ນ T50, ນັບແຕ່ຕົ້ນຊຸມປີ 1990 ເປັນຕົ້ນມາ ພື້ນຖານວັດຖຸເຕັກນິກຂ່າວສານ ໄດ້ຮັບການປັບປຸງໃຫ້ດີຂຶ້ນເທື່ອລະກ້າວ. ມາຮອດປະຈຸບັນ ໄດ້ມີການນຳໃຊ້ຄອມພິວເຕີ ເຊື່ອມຕໍ່ລະບົບອິນເຕີເນັດ ເຂົ້າໃນການຮັບຂ່າວ, ສົ່ງຂ່າວ, ຈັດຫນ້າ ແລະມີເວບໄຊ (http.//www.kpl.net..la; kplnet..net) ເປັນຂອງຕົນເອງ ທັງພາສາລາວ, ອັງກິດ ແລະ ຝຣັ່ງ ອັນໄດ້ຍົກລະດັບ ຂອງການຮັບ ແລະ ສົ່ງຂ່າວກັບຕ່າງປະເທດນັບມື້ວ່ອງໄວ ແລະທັນການ, ການດຳເນີນວຽກງານກໍມີຄວາມສະດວກຂຶ້ນເປັນກ້າວໆ. ໄປພ້ອມກັບການປັບປຸງວຽກງານພາຍໃນ, ຂ່າວສານປະເທດລາວ ໄດ້ມີການພົວພັນຮ່ວມມື ທາງດ້ານ ວິຊາການກັບຫລາຍປະເທດເພື່ອນມິດ ເປັນຕົ້ນແມ່ນ ຫວຽດນາມ, ຈີນ, ກູບາ, ລັດເຊຍ ພ້ອມທັງໄດ້ເຂົ້າເປັນສະມາ ຊິກ ຂອງບາງອົງການຈັດຕັ້ງສາກົນ ເຊັ່ນ: ອົງການຂ່າວສານ ບັນດາປະເທດບໍ່ຮ່ວມກຸ່ມ, ອົງການຂ່າວສານບັນດາປະເທດອາຊີ-ປາຊີຟິກ ( OANA ).
ມາຮອດປະຈຸບັນ ສຳນັກຂ່າວສານປະເທດລາວ ໄດ້ກາຍເປັນແຫລ່ງຂໍ້ມູນຂ່າວສານທີ່ສຳຄັນ ໃນການເຜີຍແຜ່ແນວທາງນະໂຍບາຍຂອງພັກ ແລະແຜນພັດທະນາເສດຖະກິດ-ສັຄົມຂອງລັດ ນັບທັງການເຄື່ອນໄຫວ ຂອງຜູ້ນຳພັກ, ລັດ ສ່ອງແສງທັດສະນະຂອງ ສປປ. ລາວ ຕໍ່ຕ່າງປະເທດ ກໍຄືເຫດການສາກົນ ແລະການເຄື່ອນໄຫວຂອງທົ່ວສັງຄົມ ໃນພາລະກິດປົກປັກຮັກສາ ແລະສ້າງສາປະເທດຊາດ ໂດຍຕິດພັນຢ່າງສະຫນິດແຫນ້ນກັບການຊີ້ນຳຢ່າງໃກ້ຊິດຂອງຂັ້ນເທິງ ແລະອົງການທີ່ມີສ່ວນກ່ຽວຂ້ອງ. ໃນໂອກາດນີ້ ທາງຄະນະນຳສຳນັກຂ່າວສານປະເທດລາວ ຂໍສະແດງຄວາມ ຂອບອົກ ຂອບໃຈ ແລະຮູ້ບຸນຄຸນ ຢ່າງລົ້ນເຫລືອ ຕໍ່ການນຳທຸກຂັ້ນ ພ້ອມທັງອົງການຈັດຕັ້ງຕ່າງໆ ທັງພາກລັດ ແລະເອກະຊົນ ກໍຄືຜູ້ອ່ານ ແລະເພື່ອນຮ່ວມງານທຸກໆທ່ານ ທີ່ໃຫ້ການຊີ້ນຳຊ່ວຍເຫລືອ ສຳນັກຂ່າວສານປະເທດລາວ ເຮັດສຳເລັດຫນ້າທີ່ຂອງຕົນ ແລະຫວັງວ່າຈະໄດ້ຮັບການຊີ້ນຳ ແລະຊ່ວຍເຫລືອ ຕະຫລອດໄປ. ໃນໂອກາດປີໃຫມ່ສາກົນ 2006 ນີ້ ຂໍອວຍພອນໃຫ້ບັນດາທ່ານ ຈົ່ງປະສົບຜົນສຳເລັດ ໃນຫນ້າທີ່ວຽກງານ ແລະມີຄວາມສຸກກາຍສະບາຍໃຈຕະຫລອດໄປ.

ກັບສາລະບານ