:: KPL :: Lao News Agency

ຮຽບຮຽງ: ບ່າວຜູ້ໄທ

ຈຳປາສັກ ເປັນແຂວງໃຕ້ສຸດ ຂອງ ສປປ ລາວ, ມີປະຊາກອນ 6 ແສນກວ່າຄົນ (ອັນດັບ 3 ຂອງ ປະເທດ). ແຂວງຈຳປາສັກ ເປັນດິນແດນແຫ່ງປະຫວັດສາດ ຂອງ ຊົນຊາດຂອມ ຫລື ຂະເໝນບູຮານ ທີ່ເຮືອງອຳນາດໃນສະຕະວັດທີ 4-9. ເມື່ອຊົນຊາດຂອມ ເສື່ອມອຳນາດລົງໃນສະຕະວັດທີ 10-12, ຊົນຊາດລາວ ທີ່ເຄື່ອນຍ້າຍ ມາຈາກພາກໃຕ້ ຂອງ ຈີນ ກໍ່ໄດ້ເຕົ້າໂຮມກັນ ແລະ ເຂົ້າຢູ່ຮ່ວມກັບຊາວຂອມ ພາຍຫລັງເຈົ້າຟ້າງຸ່ມທ້ອນໂຮມແຜ່ນດິນ ທີ່ມີຊົນຊາດລາວອາໄສຢູ່ໃຫ້ເປັນໜຶ່ງດຽວ. ອານາຈັກຈາມປາ ຫລື ຈຳປາສັກ ກໍ່ມີຊື່ເປັນແຂວງໜຶ່ງ ຂອງ ອານາຈັກລ້ານຊ້າງ ຈົນມາເຖິງໃນສະຕະວັດທີ 18 ຫລັງຈາກນັ້ນ ຈຳປາສັກ ກໍ່ຕົກໄປຢູ່ໃຕ້ການປົກຄອງ ຂອງ ສັກດິນາຕ່າງດ້າວ. ແຕ່ຫລັງຈາກນັ້ນ ຈຳປາສັກ ກໍ່ໄດ້ກັບຄືນສູ່ອ້ອມອົກແມ່ ອີກຄັ້ງໜຶ່ງ ຈົນມາເຖິງປະຈຸບັນ. ພື້ນທີ່ເບື້ອງທິດຕາເວັນຕົກ ຂອງ ແຂວງຈຳປາສັກ ເປັນທົ່ງພຽງລ່ອງລຽບຕາມສອງຝັ່ງແມ່ນ້ຳຂອງ, ທົ່ງນາອັນກວ້າງໃຫຍ່ໄພສານແຫ່ງນີ້ໄດ້ເຮັດໃຫ້ແຂວງຈຳປາສັກ ກາຍເປັນອູ່ເຂົ້າ ອູ່ປາ, ເປັນດິນແດນທີ່ອຸດົມສົມບູນ ຂອງປະເທດ. ພູພຽງບໍລິເວນ ຊຶ່ງມີລະດັບສຸງກວ່ານ້ຳທະເລປະມານ 1.000 ກວ່າແມັດ ຊຶ່ງໃນເມື່ອກ່ອນເປັນພູເຂົາໄຟ ຈິ່ງເຮັດໃຫ້ດິນແດນແຫ່ງນີ້ງອກງາມເປັນພິເສດ ແລະ ເໝາະສົມໃຫ້ແກ່ການປູກ ກາເຟ, ໝາກສະເວີ, ມັນ ຝຣັ່ງ, ກະລ່ຳປີ, ກາລົດ, ຫົວຜັກບົ່ວໃຫຍ່...
ຈຳປາສັກ ຍັງເປັນແຫລ່ງເຕົ້າໂຮມຄວາມສາມາດບົ່ມຊ້ອນ ທາງດ້ານການທ່ອງທ່ຽວຫລາຍຢ່າງ ນັບແຕ່ການທ່ອງທ່ຽວທຳມະຊາດ, ວັດທະນະທຳ, ແຫລ່ງປະຫວັດສາດ ແລະ ເປັນແຂວງທີ່ມີເກາະດອນຫລາຍກວ່າໝູ່, ເມືອງໂຂງ ເປັນເມືອງກາງດອນ, ມີຊື່ໃນບາງເອກະສານບອແກວ່າ ເມືອງສີ່ພັນດອນ. ເຂດຊາຍແດນໃຕ້ສຸດ ແມ່ນແກ້ງໃຫຍ່ຫລີ່ຜີ ຊຶ່ງເປັນແກ້ງທີ່ງົດງາມ ໃຫຍ່ເປັນອັນດັບໜຶ່ງ ຂອງ ອາຊີ ຕາເວັນອອກສ່ຽງໃຕ້. ແກ້ງນີ້ມີໄລຍະນ້ຳໂຕນຕາດຍາວຕິດຕໍ່ກັນຫລາຍກິໂລແມັດ, ລະດັບນ້ຳໂຕນສູງນັບແຕ່ດອນໂຂງລົງໄປ 200-300 ແມັດ ສົ່ງສຽງດັງກ້ອງໄປໄກ ແລະ ເປັນແຫ່ລງທ່ອງທ່ຽວທີ່ງົດງາມອີກແຫ່ງໜຶ່ງໃນສປປ ລາວ.
ນອກນີ້ຈຳປາສັກ ຍັງມີແຫ່ລງທ່ອງທ່ຽວທຳມະຊາດ ທີ່ສວຍງາມຫລາຍອີກແຫ່ງທີ່ໜ້າຈັບໃຈເຊັ່ນ: ຕາດຟານ, ຕາດຜາສ້ວມ, ຄອນພະເພັງ...ນອກນີ້ ຍັງມີພູອາສາ, ຜາສາດຫີນ ທີ່ຜ່ານມາເອີ້ນກັນຈົນຕິດປາກວ່າ ວັດພູຈຳປາສັກ. ຊຶ່ງໃນຕຳນານ ວັດພູ ມີຊື່ວ່າ ຜາສາດລຶງຄະປະວະຣະຕະ ຊຶ່ງເປັນຊື່ໃນພາສາສັນສະກຣິດ ຕັ້ງໂດຍເຈົ້າຊີວິດຊົນຊາດຂອມ. ຫໍຜາສາດ ແຫ່ງນີ້ມີນຳກັນຫລາຍຫລັງ ຊຶ່ງຕັ້ງຢັ່ງຢາຍແຕ່ຕີນພູ ຂຶ້ນໄປຕາມເປີ້ນພູ, ໂດຍມີຂັ້ນໄດປູດ້ວຍຫີນ ກ້ອນໃຫຍ່ເປັນຊັ້ນໆ ຊຶ່ງກໍ່ດ້ວຍກ້ອນຫີນຕັດ ທີ່ມີຂະໜາດທີ່ແຕກຕ່າງກັນ ນັບແຕ່ເທົ່າກ້ອນດິນຈີ່ ໄປຈົນເຖິງຂະໜາດໜຶ່ງແມັດ, ແຕ່ລະກ້ອນມີການຄວັດລິງລາຍໃສ່ ຕາມເລື່ອງລາວ ຂອງ ສາສະໜາພາມ ຄື ມີຮູບພະເຈົ້າອົງສຳຄັນໃນສາສະໜານີ້ເຊັ່ນ: ພະຊີວະ, ພະນາຣາຍ, ພະວິດສະນຸ, ນາງຟ້າ ຫລື ນາງ ອັບປະ ສອນ...ນັກປະຫວັດສາດ ແລະ ຜູ້ຊຽວຊານດ້ານວັດຖຸບູຮານ ມີຄວາມເຫັນວ່າ ຜາສາດຫີນແຫ່ງນີ້ ຖືກສ້າງຂຶ້ນໃນລະຫວ່າງ ພສ 1200 ຫລື ຄສ 700) ແລະ ມີການກໍ່ສ້າງເລື້ອຍມາຫລາຍຍຸກ ຫລາຍສະໄໝ, ແຕ່ໄດ້ຖືກເພພັງ ຫັກໂຄ່ນລົງມາ ຍ້ອນການເວລາ ທີ່ບໍ່ມີການບົວລະບັດຮັກສາ.
ປີ 1989, ລັດຖະບານລາວ ກໍ່ໄດ້ລົງມືປູລະນະສ້ອມແປງວັດພູ ໂດຍການຮ່ວມມື, ຊ່ວຍເຫລືອຈາກອົງການສາກົນ ແລະ ບັນດາປະເທດເພື່ອນມິດ. ມາໃນວັນທີ 14/12/2001, ຜາສາດຫີນ ວັດພູ ໄດ້ຖືກປະກາດໃຫ້ເປັນມໍລະດົກໂລກ ໂດຍອົງການສະຫະປະຊາຊາດ ເພື່ອວັດທະນະທຳ ແລະ ການສຶກສາ ຫລື ອຸຍແນັສໂກ ໃນພື້ນທີ່ 400 ຕາລາງກິໂລແມັດ, ເປັນແຫ່ງທີ່ສອງ ຂອງ ສປປ ລາວ ແລະ ເປັນແຫ່ງທຳອິດທີ່ຮູ້ຈັກໃນອາຊີຕາເວັນອອກສ່ຽງໃຕ້. ໃນກອງປະຊຸມວ່າດ້ວຍການຟື້ນຟູ ວັດພູ ຈຳປາສັກ ໃນ 5 ປີຂ້າງໜ້າ 2005-2010 ຊຶ່ງຈັດຂຶ້ນໃນວັນທີ 24/1/2006 ຜ່ານມາ ທີ່ສະໂມສອນ ຫລັກສີ່ ແຂວງຈຳປາສັກ ພາຍໃຕ້ ການເປັນປະທານ ຂອງ ທ່ານ ໝູນແກ້ວ ອໍລະບູນ, ລັດຖະມົນຕີກະຊວງຖະແຫລງຂ່າວ-ວັດທະນະທຳ, ທ່ານ ສອນໄຊ ສີພັນດອນ, ຮອງເຈົ້າແຂວງຈຳປາສັກ, ປະທານມໍລະດົກໂລກ ຂອງ ແຂວງ, ມີບັນດາທ່ານ ຫົວໜ້າກົມ ແລະ ນັກຊ່ຽວຊານຈາກອົງການອຸຍແນັສໂກ... ເຂົ້າຮ່ວມ. ທີ່ປະຊຸມໄດ້ຕົກລົງກັນໃນຫລາຍບັນຫາ ໃນການຟື້ນຟູ ວັດພູຄືນໃໝ່ ທີ່ຈະຈັດຕັ້ງປະຕິບັດ ນັບແຕ່ປີ 2005-2010, ຊຶ່ງໄດ້ແບ່ງອອກເປັນ 4 ເຂດເຊັ່ນ: ເຂດປົກປັກຮັກສາມໍລະດົກ ແລະ ພື້ນທີ່ທາງວັດທະນະທຳ ຈຳປາສັກ. ເຂດອະນຸລັກສະພາບແວດລ້ອມທາງສາສະໜາ ໂດຍປະກອບມີພູເກົ້າ. ເຂດສຶກສາຄົ້ນຄວ້າ ທາງດ້ານວັດຖຸບູຮານ, ຊຶ່ງລວມມີ 3 ບ່ອນ: ພື້ນທີ່ ຂອງ ວັດພູ ແລະ ເມືອງລິງຄະປູລະ, ເມືອງບູຮານ ແລະ ພື້ນທີ່ເມືອງໂຕະໂມະ. ເຂດຄຸ້ມຄອງປົກປັກຮັກສາ ສະຖານບູຮານ. ຂະນະນີ້ ທາງຂຶ້ນໄປວັດພູ ກຳລັງໄດ້ຮັບການສ້ອມແປງຄືນໃໝ່, ບັນດາເສົາເສ ທີ່ຖືກເປ່ເພ ກໍ່ໄດ້ປັບປຸງຄືນໃຫ້ຢູ່ໃນສະພາບເດີມເທົ່າທີ່ຈະເຮັດໄດ້.
ໃນ 5 ປີ ຜ່ານມາ ໄດ້ມີນັກທ່ອງທ່ຽວ ທັງພາຍໃນ ແລະ ຕ່າງປະເທດ ໄດ້ເຂົ້າມາທ່ຽວຊົມວັດພູ ແລະ ຕົວເມືອງຈຳປາສັກ ນັບມື້ເພີ່ມຂຶ້ນ, ສະນັ້ນພື້ນທີ່ ແລະ ສະຖານທີ່ໄດ້ກາຍເປັນຮອງຮັບນັກທ່ອງທ່ຽວ ຈິ່ງຈຳເປັນຈະຕ້ອງມີການພັດທະນາຢ່າງລະອຽດ ເພື່ອປົກປັກຮັກສາ ແລະ ຍົກລະດັບລວມ ຂອງ ມັນ ໃຫ້ຄືນສະພາບປະຫວັດສາດ ຂອງ ສະຕະວັດທີ 19-20. ນອກນີ້ ທາງໂຄງການຍັງຈະສ້າງເວບໄຊ ເພື່ອໃຫ້ນັກທ່ອງທ່ຽວ ແລະ ຜູ້ສົນໃຈໄດ້ຮູ້ ແລະ ເຂົ້າເຖິງຂໍ້ມູນຂ່າວສານ ແລະ ຮີດຄອງປະເພນີວັດທະນະທຳລາວ ເວົ້າລວມ, ເວົ້າສະເພາະແມ່ນປະຊາຊົນໃນເຂດວັດພູ. ພ້ອມນີ້ ຍັງມີແຜນຈະສ້າງບ້ານພັກ ຢູ່ດອນແດງ ໂດຍມີສ່ວນຮ່ວມ ຂອງ ປະຊາຊົນທ້ອງຖິ່ນ, ຊຶ່ງທີ່ຜ່ານມາ ກໍ່ມີນັກທ່ອງທ່ຽວເຂົ້າໄປທ່ຽວ ແລະ ໃຫ້ຄວາມສົນໃຈເປັນຢ່າງດີ. ສ້າງກຸ່ມຫັດຖະກຳທ້ອງຖິ່ນ, ຮີດຄອງປະເພນີ (ໜັງປະລັດຕື້) ສ້າງກຸ່ມນຳທ່ຽວ...ທັງນີ້ແມ່ນເພື່ອໃຫ້ນັກທ່ອງທ່ຽວໄດ້ເຂົ້າເຖິງຊີວິດການເປັນຢູ່ ຂອງ ປະຊາຊົນ, ວັດທະນະທຳ ຊື້ຜະລິດຕະພັນ ທີ່ປະຊາຊົນຜະລິດ, ທັງນີ້ແມ່ນເພື່ອສ້າງລາຍໄດ້ໃຫ້ປະຊາຊົນ.
ແຕ່ແຜນຈັດຕັ້ງປະຕິບັດ ຈະຕ້ອງປະຕິບັດຕາມແນວທາງນະໂຍບາຍ ຂອງ ລັດຖະບານລາວ ແລະ ຜູ້ຊ່ຽວຊານ, ທີ່ປຶກສາ, ໂດຍສະເພາະຈະຕ້ອງປະຕິບັດຕາມທິດຊີ້ນຳ ຂອງ ທ່ານ ລັດຖະມົນຕີກະຊວງຖະແຫລງຂ່າວ-ວັດທະນະທຳ, ຂອງ ທ່ານ ຮອງເຈົ້າແຂວງ ແລະ ພະແນກຖະແຫລງຂ່າວ-ວັດທະນະທຳ ແຂວງຈຳປາສັກ ທີ່ໄດ້ປະກອບຢູ່ໃນກອງປະຊຸມຄັ້ງວັນທີ 24 ມັງກອນ 2006 ຜ່ານມາ ທີ່ເມືອງປາເຊ.