ກະແສເພງບ້ານເຮົາໃນປະຈຸບັນກັບຄ່ານິຍົມຂອງສັງຄົມ
 |
|---|
|
 |
|
 |
|
 |
|
ກົດບ່ອນນີ້ ເພື່ອເບິ່ງສະພາບອາກາດ ໃນ ຫຼວງພະບາງ, ສະຫວັນນະເຂດ ແລະ ປາກເຊ. |
|
ສ. ສາຍນ້ຳຂອງ
ເນື້ອໃນບົດເພງ, ບົດຂັບລຳ, ບົດກາບກອນ, ເລື່ອງສັ້ນ, ນະວະນິຍາຍຕ່າງໆລ້ວນແຕ່ແມ່ນວັດທະນະທຳທາງດ້ານຈິດໃຈ ທີ່ສະທ້ອນໃຫ້ເຫັນຄວາມມັກ,
ຄວາມນິຍົມ ແລະ ສະພາບການຂອງສັງຄົມໃນຍຸກນັ້ນໆ. ບົດຂຽນໃນແຕ່ລະຍຸກຫລືບົດເພງໃນແຕ່ລະໄລຍະຈະພາພວກເຮົາເຫັນສະພາບຂອງສັງຄົມ ໃນໄລຍະນັ້ນໄດ້ເປັນຢ່າງດີ, ພ້ອມນີ້ຍັງສະແດງໃຫ້ເຫັນເຖິງພູມປັນຍາຂອງຜູ້ແຕ່ງ, ຄວາມສາມາດໃນການສ້າງມະໂນພາບໃນການປະດິດແຕ່ງທີ່ສາມາດຈູງໃຈໃຫ້ພວກເຮົາ
ອ່ານແລ້ວຢາກອ່ານອີກຫລືຖ້າເປັນບົດເພງກໍ່ແມ່ນຟັງແລ້ວຢາກຟັງອີກຢ່າງອີ່ມບໍ່ເປັນ. ເຊິ່ງສິ່ງນີ້ເປັນສິ່ງທີ່ນັກແຕ່ງລຸ້ນກ່ອນເພິ່ນໄດ້ປະໄວ້ໃຫ້ພວກເຮົາ. ມາຮອດໄລຍະປະຈຸບັນ
ຖັນແຖວນັກແຕ່ງ, ນັກຂີດຂຽນແມ່ນມີຫລວງຫລາຍສົມຄວນທັງມີຄວາມຮູ້ຄວາມສາມາດສູງແຕ່ສັງເກດເຫັນວ່າ
ສິ່ງທີ່ນັກແຕ່ງປະຈຸບັນສ່ວນຫລາຍຍັງຂາດກໍ່ຄືຄວາມພຽນ, ຄວາມອົດທົນທີ່ຈະ
ຂຽນໃຫ້ບົດກອນ, ບົດເພງຂອງຕົນອອກມາດີຍັງເຮັດແບບ
“ສຸກເອົາເຜົາກິນ” ຈິ່ງເຮັດໃຫ້ເນື້ອໃນຈັງຫວະທຳນອງບໍ່ທັນເລິກເຊິ່ງ.
ນີ້ຄືຄວາມເປັນຈິງຂອງວົງການເພງບ້ານເຮົາໃນປະຈຸບັນທີ່ສ່ວນຫລາຍເນັ້ນໄປທາງ
ປະລິມານຫລາຍ ກວ່າຄຸນນະພາບ. ຈາກຈຸດນີ້ຈິ່ງເຮັດໃຫ້ນັກຮ້ອງທີ່ມີຊື່ສຽງ
ແລະ ບັນດາວົງດົນຕີຕະຫລອດຮອດນັກຮ້ອງສະໝັກຫລິ້ນທັງຫລາຍນິຍົມ
ກັນນຳເອົາເພງເກົ່າໆ ມາຮ້ອງຄືນໃໝ່ ແລະ ກໍ່ໄດ້ຮັບຄວາມນິຍົມກັນຢ່າງ
ກວ້າງຂວາງ. ເຊິ່ງສິ່ງດັ່ງກ່າວຈະວ່ານັກຮ້ອງສ່ວນຫລາຍເປັນໄວກາງຄົນຫລືມີອາຍຸຫລາຍ
ກໍ່ຄົງຈະບໍ່ຜິດ
ແຕ່ເບິ່ງໂດຍທົ່ວໄປ ເພງດັ່ງກ່າວກໍ່ຖືກຕອບຮັບຈາກ
ສັງຄົມເປັນຢ່າງດີ ເຫັນໄດ້ຈາກການໃຊ້ບໍລິການໃນງານ ດອງ ຫລື ງານສ້າງສັນຕ່າງໆ.
ຕໍ່ກັບບັນຫານີ້, ທ່ານ ອຸໄທ ສຸວັນນະພາສີ ຫົວໜ້າຂະແໜງຄົ້ນຄວ້າຄຸ້ມຄອງວັດທະນະທຳພະແນກຖະແຫລງຂ່າວ-
ວັດທະນະທຳ
ແຂວງຈຳປາສັກ ແລະ ທ່ານ ໃຈຄຳ ຄັນສີລາ ຮອງຫົວໜ້າຂະແໜງດັ່ງກ່າວ
ທັງເປັນນັກສິລະປິນ-ນັກແຕ່ງເພງອາວຸໂສ ທ່ານ ໄດ້ໃຫ້ທັດສະນະວ່າບົດເພງເກົ່າທີ່ນັກຮ້ອງລຸ້ນປະຈຸບັນນຳມາຮ້ອງໃຫມ່ ແມ່ນມີເນື້ອໃນ
ໜັກແໜ້ນຮັດກຸມ, ມີຄວາມໝາຍເລິກເຊິ່ງ, ຖືກຕ້ອງຕາມຫລັກການແຕ່ງເພງ
ມີການສຳພັດ, ການສອດແຊກສັບສຳນວນວັນນະຄະດີທີ່ໃຫ້ຄວາມໝາຍ
ຄົບຖ້ວນ, ຈັງຫວະທຳນອງມີເອກະລັກສະເພາະ ບໍ່ລອກ ລຽນແບບສະນັ້ນຈິ່ງເຮັດໃຫ້ບົດເພງລຸ້ນເກົ່າບໍ່ວ່າຈະເປັນເພງທີ່ເວົ້າເຖິງຄວາມຮັກ-ມັກ ຫລື ເພງປຸກລະດົມນ້ຳໃຈປະຕິວັດ ຟັງແລ້ວຈິ່ງກິນໃຈ ໃຫ້ມະໂນພາບດີຟັງແລ້ວຢາກຟັງອີກແຕກຕ່າງກັບເພງທີ່ແຕ່ງຂຶ້ນໃໝ່ໆ ທີ່ແລ່ນນຳຕະຫລາດ ເຊິ່ງສ່ວນຫລາຍເນື້ອໃນບໍ່ເລິກເຊິ່ງ, ການແຕ່ງບໍ່ເຂົ້າຫລັກການ, ການໃຊ້ສັບພາສາສື່ຄວາມໝາຍ
ກໍ່ເບົາບາງ, ການແຍກສຽງ, ການປະສານສຽງກໍ່ເຮັດແບບສະບາຍໂພດ, ລວມທັງນັກຮ້ອງກໍ່ຂາດຄວາມເອົາໃຈໃສ່ໃນການຝຶກແອບ ແລະບັນຫາອື່ນໆ.
ຈາກບັນດາທັດສະນະ ແລະ ກະແສສັງຄົມກ່ຽວກັບເພງບ້ານເຮົາໃນປະຈຸບັນ,
ນັກແຕ່ງ, ນັກຂຽນເພງກໍ່ຄືພາກສ່ວນກວດກາເນື້ອໃນ ຈິ່ງຄວນຫັນມາເບິ່ງຄືນໃນຈຸດນີ້ວາຄວນປັບປຸງແນວໃດ ຈິ່ງຈະໄດ້ບົດເພງ, ບົດຂັບລຳອອກມາດີ, ມີເນື້ອໃນຈັງຫວະທຳນອງຈັບອົກຈັບໃຈກາຍເປັນເພງລຳທີ່ອຳມະຕະຄືເນື້ອໃນເພງໄລຍະກ່ອນໆ
ຖ້າເຮັດໄດ້ຄືແນວນັ້ນຈິ່ງຈະສາມາດເຊີດຊູບົດບາດຂອງເພງບ້ານເຮົາໃຫ້ສູງເດັ່ນກາຍເປັນ
ແຮງດຶງດູດໃຫ້ຄົນລາວເຮົານິຍົມເພງຂອງຕົນເອງສູງຂຶ້ນເທື່ອລະກ້າວ.
