ເສບຫລາຍ ຈົນກາຍເປັນບ້າ
ບ່າວຜູ້ໄທ
ໃນປະຈຸບັນນີ້, ບັນຫາຢາເສບຕິດ ກຳລັງເປັນໄພອັນຕະລາຍ ຊຶ່ງມັນໄດ້ທຳລາຍອະນາຄົດ ຂອງ ຜູ້ຄົນບໍ່ຈັກວ່າເທົ່າໃດມາແລ້ວ, ເປັນຕົ້ນແມ່ນຊາວໜຸ່ມ, ເຍົາວະຊົນ, ສະນັ້ນບັນຫາຕິດຢາເສບຕິດ ກຳລັງເປັນບັນຫາໃຫຍ່, ແຕ່ດ້ວຍສາເຫດໃດ ທີ່ພາໃຫ້ຄົນເຫລົ່ານັ້ນຫັນໄປໃຊ້ຢາເສບຕິດ? ດັ່ງເລື່ອງທີ່ເກີດຂຶ້ນກັບທ້າວ ສົມເພັດ (ນາມສົມມຸດ).
ຄົນເຮົາທຸກຄົນ ທີ່ເກີດມາຕ່າງກໍ່ຢາກມີຊີວິດການເປັນຢູ່ທີ່ດີ, ແຕ່ຢາກມີຊີວິດທີ່ດີກໍ່ຕ້ອງດີ້ນຮົນໃນການຊອກຫາວຽກເຮັດງານທຳ ບໍ່ວ່າວຽກນັ້ນຈະໜັກ ຫລື ເບົາ ເພື່ອໃຫ້ໄດ້ສິ່ງທີ່ຕົນຕ້ອງການ, ໜຶ່ງໃນຫລາຍໆ ຄົນນັ້ນ ກໍຄືທ້າວ ສົມເພັດ, ອາຍຸ 30 ປີ ຮຽນຈົບປໍ 5 ຢູ່ເມືອງໜຶ່ງ ຂອງ ແຂວງສະຫວັນນະເຂດ ກໍ່ເປັນຊາວໜຸ່ມຜູ້ໜຶ່ງທີ່ບໍ່ຄອຍຖ້າວາດສະໜາຍູ້ສົ່ງ, ສະນັ້ນເຂົາຈຳເປັນຕ້ອງຊອກຫາວຽກເຮັດງານທຳມາຊ່ວຍເຫລືອພໍ່ແມ່ ໃນການຄ້ຳຈູນຄອບຄົວ ທີ່ມີອ້າຍນ້ອງຮ່ວມອຸທອນກັນເຖິງ 8 ຄົນ ແລະ ຄອບຄົວກໍ່ມີຖານະຍາກຈົນ. ໃນເບື້ອງຕົ້ນ ທ້າວ ສົມເພັດ ໄດ້ໄປພົບກັບໝູ່ ແລ້ວກໍ່ຊວນກັນໄປຊອກຫາເຮັດວຽກຢູ່ຝັ່ງຂອງເບື້ອງນັ້ນ, ຊຶ່ງພໍ່ແມ່ ກໍ່ໄດ້ຫ້າມແລ້ວ ແຕ່ທ້າວ ສົມເພັດ ກໍ່ບໍ່ຟັງ.
ເມື່ອໄປເຖິງທ້າວ ສົມເພັດ ກໍ່ຊອກໄດ້ວຽກເຮັດຕາມຄວາມຫວັງ, ເຂົາເຮັດວຽກຢູ່ສວນອ້ອຍ, ສວນໝາກມ່ວງ ໄດ້ເງິນເດືອນໆ ລະ 3.000 ບາດ. ໃນຂະນະດຽວກັນ ເຈົ້າຂອງສວນ ກໍ່ບອກວ່າ ຖ້າພວກເຈົ້າຢາກໄດ້ເງິນຫລາຍ ກໍ່ຕ້ອງເຮັດວຽກຫລາຍ, ກາງຄືນກໍ່ເຮັດ. ຍ້ອນເຫັນກ່ເງິນ, ແຕ່ຍ້ອນຮ່າງກາຍທົນຕໍ່ຄວາມອິດເມື່ອຍບໍ່ໄດ້ ຈິ່ງພາກັນສັກຢາ ເຂົ້າທາງເສັ້ນເລືອດ ເພາະເຈົ້າຂອງສວນເຂົາເອົາມາຂາຍໃຫ້ ແລ້ວພາກັນເຮັດວຽກຕໍ່ໄປ. ເຮັດຄືແບບນີ້ ຈົນເປັນການລື້ງເຄີຍ, ຖ້າມື້ໃດບໍ່ໄດ້ສັກຢາ ກໍ່ບໍ່ມີແຮງເຮັດວຽກ.
ທ້າວ ສົມເພັດ ເຮັດວຽກຢູ່ປະເທດໄທ ເປັນເວລາປີກວ່າ ກໍ່ກັບບ້ານ ເພື່ອຊ່ວຍພໍ່ແມ່ ເຮັດໄຮ່ໄຖນາ ໄດ້ປະມານ 3 ເດືອນ, ໃນໄລຍະນີ້ ຖ້າມື້ໃດ ບໍ່ມີຢາໃຫ້ສັກ ຫລື ກິນ ເຂົາກໍ່ຈະເກີດອາການປ່ວງບ້າອາລະວາດ, ໃຜເວົ້າຫຍັງກໍ່ບໍ່ຟັງ ແລະ ອາການກໍ່ໜັກຂຶ້ນເລື້ອຍໆ ຈົນເສຍສະຕິ, ຊຶ່ງປັດຈຸບັນຜູ້ກ່ຽວໄດ້ ເປັນລອ່ຍນຳອີກ ໄປໃສມາໃສກໍ່ບໍ່ໄດ້, ຖາມຫຍັງກໍ່ບໍ່ຮູ້ເລື່ອງ.
|
