:: KPL :: Lao News Agency

ກອງປະຊຸມໃຫຍ່ ຜູ້້ແທນທົ່ວປະເທດ ຄັ້ງທີ III ຂອງພັກ:
ກອງປະຊຸມໃຫຍ່ ຜູ້້ແທນທົ່ວປະເທດ ຄັ້ງທີ III ຂອງພັກ ໄດ້ໄຂຂຶ້ນ ແຕ່ວັນທີ 27-30 ເມສາ 1982 ທີ່ນະຄອນຫລວງວຽງຈັນ ໂດຍມີຜູ້ແທນສົມບູນເຂົ້າຮ່ວມ 228 ສະຫາຍ ທີ່ເປັນຕົວແທນໃຫ້ສະ ມາຊິກພັກ 35.000 ສະຫາຍ ໃນທົ່ວປະເທດ ແລະ ມີແຂກຕ່າງປະເທດເຂົ້າຮ່ວມ 17 ຄະນະ.
ລາຍງານການເມືອງ ໄດ້ສະຫລຸບສັງລວມ ໄຊຊະນະຂອງການປະຕິວັດຊາດ ປະຊາທິປະໄຕ ແລະ ຜົນງານທີ່ຍາດມາໄດ້ໃນ 6 ປີ ແຫ່ງການກໍ່ສ້າງລະບອບໃຫມ່, ກຳນົດແນວທາງ ແລະ ທິດທາງ ຫນ້າທີ່ຂອງການປະຕິວັດໃນໄລຍະໃຫມ່, ໄລຍະແຫ່ງການປົກປັກຮັກສາ ເອກະລາດແຫ່ງຊາດ ແລະ ຂ້າມຜ່ານກ້າວຂຶ້ນສູ່ສັງຄົມນິຍົມເທື່ອລະກ້າວ.
ກອງປະຊຸມໃຫຍ່ ໄດ້ວາງບາງຈຸດຫມາຍພື້ນຖານຂອງການປະຕິວັດລາວ ໃນໄລຍະໃຫມ່ຄື: “ບໍ່ລົດລະໃນການເພີ່ມທະວີ ແລະ ບູລະນະລະບົບຜະເດັດການກຳມະຊີບ, ປະຕິບັດສິດເປັນເຈົ້າຂອງປະຊາຊົນຜູ້້ ອອກແຮງງານເຜົ່າຕ່າງໆ, ກໍ່ສ້າງພື້ນຖານວັດຖຸ - ເຕັກນິກ ອັນຈຳເປັນຂອງ ລະບອບສັງຄົມນິຍົມ ເຮັດໃຫ້ເສດຖະກິດແຫ່ງຊາດ ມີພື້ນຖານກະສິກຳ - ປ່າໄມ້ ແລະ ອຸດສາຫະກຳຂະຫຍາຍຕົວ, ກໍ່ສ້າງ ແລະ ບູລະນະການພົວພັນແຫ່ງການຜະລິດສັງຄົມນິຍົມ, ຮັບປະກັນໃຫ້ບັນດາພາກສ່ວນເສດຖະກິດສັງຄົມນິຍົມ ກວມຖາ ນະຄອບຄອງໃນພື້ນຖານເສດຖະກິດແຫ່ງຊາດ, ກໍ່ສ້າງ ແລະ ບຳລຸງພະນັກງານ, ກຳມະກອນເພື່ອໃຫ້ມີ ຄວາມສາມາດພຽງພໍໃນການສ້າງສາພັດທະນາ ແລະ ເປັນເຈົ້າປະເທດຊາດ, ເປັນເຈົ້າສັງຄົມ, ສາມັກຄີເຜົ່າຕ່າງໆ, ສູ້້ຊົນນຳເອົາເຜົ່າຕ່າງໆກ້າວທຽບທັນກັນ, ປອງດອງກັນຢ່າງແທ້ຈິງຢູ່ໃນວົງຄະນາຍາດຂອງຊາດລາວເຮັດໃຫ້ຊີວິດການເປັນຢູ່ທາງດ້ານວັດຖຸ ແລະ ວັດທະນະທຳຂອງປະຊາຊົນ ແລະ ເຜົ່າໃຫ້ດີຂຶ້ນ”.
ກອງປະຊຸມໃຫຍ່ຄັ້ງນີ້ ໄດ້ຮັບຮອງເອົາທິດທາງຫນ້າທີ່ແຜນການພັດທະນາເສດຖະກິດ - ສັງຄົມ 5 ປີເທື່ອທີ I (1981-1985), ຮັບຮອງເອົາກົດລະບຽບດັດແປງຂອງພັກ ແລະ ເລືອກຕັ້ງຄະນະບໍລິຫານງານສູນກາງພັກຊຸດໃຫມ່ ລວມມີ ກຳມະການສົມບູນ 49 ສະຫາຍ, ກຳມະການສຳຮອງ 6 ສະຫາຍ. ກອງປະຊຸມຄົບຄະນະຄັ້ງທີ I ຂອງຄະນະບໍລິຫານງານສູນກາງພັກ ສະໄຫມທີ III ໄດ້ເລືອກຕັ້ງກົມການເມືອງສູນກາງພັກ ປະກອບມີ 7 ສະຫາຍຄື: ໄກສອນ ພົມວິຫານ, ຫນູຮັກ ພູມສະຫວັນ, ສຸພານຸວົງ, ພູມີ ວົງວິຈິດ, ຄຳໄຕ ສີພັນດອນ, ພູນ ສີປະເສີດ ແລະ ສີສົມພອນ ລໍວັນໄຊ. ສະຫາຍ ໄກສອນ ພົມວິຫານ ໄດ້ຮັບເລືອກຕັ້ງເປັນເລຂາທິການໃຫຍ່ ຄະນະບໍລິຫານງານສູນການພັກອີກເທື່ອໃຫມ່.