- ກອງປະຊຸມໃຫຍ່ຜູ້້ແທນທົ່ວປະເທດ
ຄັ້ງທີ VI ຂອງພັກ:
ກອງປະຊຸມໃຫຍ່ຜູ້້ແທນທົ່ວປະເທດ ຄັ້ງທີ VI ຂອງພັກ ໄດ້ໄຂຂຶ້ນ
ແຕ່ວັນທີ 18-20 ມີນາ 1996
ທີ່ນະຄອນຫລວງວຽງຈັນໂດຍມີຜູ້້ແທນສົມບູນເຂົ້າຮ່ວມ 381 ສະຫາຍ  ທີ່ເປັນຕົວແທນໃຫ້ແກ່ສະມາຊິກພັກ
78.000 ສະຫາຍ ໃນທົ່ວປະເທດ.
ບົນພື້ນຖານການໄຈ້ແຍກຜົນງານ ແລະ ຂໍ້ຂາດຕົກບົກພ່ອງຜ່ານມາ
ລາຍງານການເມືອງໄດ້ມີຂໍ້ສະຫລຸບ ແລະ
ຖອດຖອນບົດຮຽນອັນປະເສີດຈາກພຶດຕິກຳອັນມີຊີວິດຊີວາ
ແຫ່ງການດຳເນີນພາລະກິດປ່ຽນແປງໃຫມ່ໃນໄລຍະ 10 ປີຜ່ານມາຄື:
1. ການເພີ່ມທະວີຄວາມສາມັກຄີເປັນເອກະພາບໃນທົ່ວພັກ, ທົ່ວປວງຊົນ
ຕິດແຫນ້ນກັບການເຊີດຊູນ້ຳໃຈຮັກຊາດ, ເສີມຂະຫຍາຍຈິດໃຈເອກະລາດ,
ເປັນເຈົ້າຕົນເອງ, ເພິ່ງຕົນເອງ ແລະ
ສ້າງຄວາມເຂັ້ມແຂງດ້ວຍຕົນເອງແມ່ນປັດໄຈຕັດສິນຜົນສຳເລັດຂອງພາລະກິດປ່ຽນແປງໃຫມ່.
2. ອີງໃສ່ປະຊາຊົນ, ເສີມຂະຫຍາຍກຳລັງແຮງອັນມະຫາສານຂອງປະຊາຊົນ ແລະ
ເຮັດທຸກສິ່ງທຸກຢ່າງເພື່ອຜົນປະໂຫຍດຂອງປະຊາຊົນ.
3. ຮັບປະກັນສະຖຽນລະພາບທາງດ້ານການເມືອງ, ຄວາມສະຫງົບ ແລະ
ຄວາມເປັນລະບຽບຮຽບຮ້ອຍໃນສັງຄົມ ແມ່ນເງື່ອນໄຂອັນຈຳເປັນສຳລັບການປ່ຽນແປງໃຫມ່.
4. ເພີ່ມທະວີບົດບາດນຳພາຂອງພັກໃນທຸກຂົງເຂດວຽກງານ ແລະ
ເຊີດຊູຄວາມສັກສິດແຫ່ງການ ຄຸ້ມຄອງລັດ
ແມ່ນເງື່ອນໄຂຮັບປະກັນໃຫ້ແກ່ການປ່ຽນແປງໃຫມ່
ດຳເນີນໄປຢ່າງຖືກຕ້ອງ ຕາມແນວທາງ ແລະ ຈຸດຫມາຍຂອງພັກ,
ເສີມຂະຫຍາຍກຳລັງແຮງຂອງຊາດສົມທົບກັບກຳລັງແຮງຂອງຍຸກສະໄຫມ.
5. ຍາດແຍ່ງເອົາການສະຫນັບສະຫນູນ ແລະ
ການຊ່ວຍເຫລືອຈາກສາກົນຢ່າງມີຫລັກການ.
ອັນນັ້ນມັນແມ່ນເງື່ອນໄຂຈຳເປັນທີ່ຂາດບໍ່ໄດ້
ສຳລັບການສ້າງສາພັດທະນາປະເທດຊາດ ຂອງພວກເຮົາ.
ກອງປະຊຸມໃຫຍ່ໄດ້ໄຈ້ແຍກສະພາບແວດລ້ອມສາກົນ ແລະ
ສະພາວະຄວາມເປັນຈິ່ງຂອງປະເທດຊາດຢ່າງເລິກເຊິ່ງ ແລະ ຊີ້ບອກວ່າ
ພວກເຮົາມີຄວາມສາມາດພຽງພໍທີ່ຈະສ້າງສາປະເທດຊາດ
ໃຫ້ຈະເລີນກ້າວຫນ້າ ໂດຍຜ່ານແຕ່ລະບາດກ້າວອັນແນ່ນອນ.
ບົນຈິດໃຈດັ່ງກ່າວນັ້ນ ກອງປະຊຸມໃຫຍ່ໄດ້ກຳນົດຈຸດຫມາຍສຳລັບໄລຍະແຕ່ນີ້
ຮອດປີ 2020.
ກອງປະຊຸມໃຫຍ່ ໄດ້ເລືອກຕັ້ງຄະນະບໍລິຫານງານສູນກາງພັກສະໄຫມທີ VI
ຊຶ່ງປະກອບດ້ວຍ 49 ສະຫາຍ. ກອງປະຊຸມຄັ້ງທີ I ສະໄຫມທີ VI
ໄດ້ເລືອກຕັ້ງກົມການເມືອງສູນກາງພັກ ປະກອບດ້ວຍ 9 ສະຫາຍຄື: ຄຳໄຕ
ສີພັນດອນ, ສະຫມານ ວິຍະເກດ, ອຸດົມ ຂັດຕິຍະ, ຈູມມະລີ ໄຊຍະສອນ, ທອງສິງ
ທຳມະວົງ, ໂອສະກັນ ທຳມະເທວາ, ບຸນຍັງ ວໍລະຈິດ, ສີສະຫວາດ
ແກ້ວບຸນພັນ, ອາຊາງ ລາວລີ. ກອງປະຊຸມໄດ້ເລືອກ ສະຫາຍ ຄຳໄຕ ສີພັນດອນ
ເປັນປະທານຄະນະບໍລິຫານງານສູນກາງພັກ ແລະ ໄດ້ແຕ່ງຕັ້ງ ສະຫາຍ
ຫນູຮັກ ພູນສະຫວັນ ເປັນທີ່ປຶກສາຂອງຄະນະບໍລິຫານງານສູນກາງພັກ.
|
