ກ​ອງປະຊຸມ​ໃຫຍ່​ຜູ້້​ແທນ​ທົ່ວ​ປະ​ເທດ ຄັ້ງທີ VII ຂອງ​ພັກ:
ກ​ອງປະຊຸມ​ໃຫຍ່​ຜູ້້​ແທນ​ທົ່ວ​ປະ​ເທດ ຄັ້ງທີ VII ຂອງ​ພັກ ​ໄດ້​ໄຂ​ຂຶ້ນ ​ແຕ່​ວັນ​ທີ 12-14 ມີນາ 2001 ທີ່​ນະຄອນຫລວງ​ວຽງ​ຈັນ ​ໂດຍ​ມີ​ຜູ້້​ແທນ​ສົມບູນ​ເຂົ້າຮ່ວມ 452 ສະຫາຍ ທີ​່ເປັນຕົວ​ແທນ​ໃຫ້​ແກ່​ສະ ມາຊິກ​ພັກ 100.000 ກວ່າສະຫາຍ ​ໃນ​ທົ່ວ​ປະ​ເທດ​.
ກອງ​ປະຊຸມ​ໃຫຍ່​ໄດ້​ເປັນ​ເອກະສັນ​ຢ່າງ​ສົມບູນ​ຕໍ່​ເນື້ອ​ໃນ​ຂອງລາຍງານການເມືອງ ກ່ຽວກັບຜົນງານ ການນຳພາຂອງພັກ ໃນໄລຍະ 45 ປີຜ່ານມາ ກໍຄືຜົນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VI, ລວມທັງ​ຂໍ້​ສະຫລຸບ 5 ຂໍ້ ທີ່​ເປັນ​ບົດຮຽນ​ກ່ຽວ​ກັບ​ການ​ນຳພາກາ​ນຈັດຕັ້ງປະຕິບັດ​ແນວທາງ​ຂອງ​ພັກໃນ​ຊຸ​ມ ປີຜ່ານມາ.
ບົນ​ພື້ນຖານ​ຜົນສຳ​ເລັດ​ທີ່​ບັນລຸ​ໄດ້ ໃນ​ການຈັດ​ຕັ້ງປະຕິບັດມະຕິ​ກອງ​ປະຊຸມ​ໃຫຍ່​ຄັ້ງທີ VI ຂອງ​ພັກ, ກອງ​ປະຊຸມ​ໃຫຍ່​ໄດ້​ມີ​ຄວາມ​ເປັນ​ເອກະ​ພາບ​ສູງ ຮັບຮອງ​ເອົາ​ຄາດຫມາຍ​ສູ້​ຊົນ​ແຫ່ງ​ການ​ພັດທະນາ​ປະ​ເທດ ສຳລັບ​ໄລຍະ​ຮອດ​ປີ 2020, 2010 ແລະ 2001-2005. ພ້ອມ​ກັນນັ້ນ ກອງ​ປະຊຸມ​ໃຫຍ່​ກໍໄດ້​ຢືນຢັນ​ຄວາມ​ຮັບຜິດຊອບ​ສູງ​ຕໍ່​ໂຊກ​ຊາຕາ​ຂອງ​ບ້ານ​ເມືອງ ​ແລະ ສະ​ແດງ​ຄວາມ​ຕັດສິນໃຈ​ວ່າ​ຕ້ອງ​ຊອກ​ຄົ້ນຫາ​ວິທີ​ການ​ອັນ​ຖືກຕ້ອງ, ​ເພີ່ມ​ທະວີ​ການ​ຊີ້ນຳ​ຊຸກ​ຍູ້​ຢ່າງ​ໃກ້ຊິດ​ ​ແລະ ​ເຮັດ​ວຽກ​ຢ່າງ​ເອົາ​ການ​ເອົາ​ງານ, ຂຸດ​ຄົ້ນ ແລະ ນຳ​ໃຊ້​ກຳລັງ​ແຮງບົ່ມ​ຊ້ອນຂອງ​ຊາດ, ຂອງ​ທ້ອງ​ຖິ່ນ​ຢ່າງ​ສຸດ​ຂີດ ​ເພື່ອ​ແກ້​ໄຂ​ຄວາມ​ຮຽກຮ້ອງ​ຕ້ອງການຂອງ​ສັງຄົມ​ໃຫ້​ໄດ້ ​ເຮັດ​ໃຫ້​ປະ​ເທ​ດຊາດ​ຂອງ​ພວກ​ເຮົາ ຫລຸດ​ພົ້ນຈາກ​ຄວາມ​ດ້ອຍ​ພັດທະນາ.
ກອງ​ປະຊຸມ​ໃຫຍ່​ໄດ້ເລືອກ​ຕັ້ງຄະນະ​ບໍລິຫານ​ງານ​ສູນ​ກາງ​ພັກ ສະ​ໄຫມ​ທີ VII ປະກອບ​ດ້ວຍ 53 ສະຫາຍ. ກອງ​ປະຊຸມ​ຄັ້ງທີ I ສະ​ໄຫມ​ທີ VII ໄດ້​ເລືອກ​ຕັ້ງກົມການ​ເມືອງ​ສູນ​ກາງ​ພັກ ປະ​ກອບ​ດ້ວຍ 11 ສະ​ຫາຍຄື: ຄ​ຳ​ໄຕ ສີພັນ​ດອນ, ສະຫມານ ວິ​ຍາະເກດ, ຈູມມະລີ ໄຊ​ຍະສອນ, ທອງ​ສິງ ທຳ​ມະ​ວົງ, ໂອສະກັນ ທຳມະເທວາ, ບຸນຍັງ ວໍລະຈິດ, ສີສະຫວາດ ແກ້ວບຸນພັນ, ອາຊາງ ລາວລີ, ທອງລຸນ ສີສຸລິດ, ດວງໃຈ ພິຈິດ, ບົວສອນ ບຸບຜາວັນ. ກອງປະຊຸມຄົບຄະນະຄັ້ງປະຖົມມະລຶກ ຂອງຄະນະບໍລິຫານງານສູນກາງພັກ ສະໄຫມ ທີ VII ໄດ້ເປັນເອກະສັນຢ່າງສົມບູນເລືອກຕັ້ງ ສະຫາຍ ຄຳໄຕ ສີພັນດອນ ເປັນປະທານຄະນະ ບໍລິຫານງານ ສູນກາງພັກ ແລະ ​ໄດ້​ແຕ່ງຕັ້ງ ສະຫາຍ ຫນູ​ຮັກ ພູນ​ສະຫວັນ ​ເປັນ​ທີ່​ປຶກສາ​ຂອງຄະນະ​ບໍລິຫານ​ງານ​ສູນ​ກາງ​ພັກ.