|
ຊາວເຜົ່າຜົງບ້ານນຳ້ຫະເຊື່ອໝັ້ນຕໍ່ຊີວິດໃໝ່
* ນັບວ່າເປັນນິມິດໝາຍອັນດີທີ່ເຂື່ອນໄຟຟ້າແບບປະສົມປະສານ ແຫ່ງທຳອິດ ຂອງປະເທດເຮົາ ໄດ້ຖືກເປີດບໍລິການຢູ່ຂອບເຂດບ້ານນ້ຳກະ ເມືອງຜາໄຊ, ແຂວງຊຽງຂວາງ ຫວ່າງທ້າຍເດືອນ ເມສາ 2007 ນີ້ເປັນຕົ້ນມາ ເຊິ່ງມັນໄດ້ກາຍເປັນຂີດໝາຍສຳຄັນໜຶ່ງ ໃນການເປີດໂສມໜ້າໃໝ່ແກ່ຊາວບ້ານນ້ຳກະ, ເພື່ອພັດທະນາຕົນເອງໃຫ້ຫ່າງອອກຈາກສະພາບທຸກຍາກຂາດເຂີນ ຄືໃນເມື່ອກ່ອນໄປເທື່ອລະກ້າວ. ບ້ານນ້ຳກະ ແມ່ນບ້ານຂອງພີ່ນ້ອງຊາວເຜົ່າມົ້ງ ຂຶ້ນກັບເມືອງຜາໄຊ, ແຂວງຊຽງຂວາງ ເຊິ່ງໄດ້ຮັບການສ້າງຕັ້ງຂຶ້ນມາແຕ່ດົນແລ້ວ, ທ່ານ ຫວັງລໍຢາງ ນາຍບ້ານ ບ້ານນ້ຳກະ ໄດ້ເປີດເຜີຍວ່າ: ທຳອິດບ້ານ ຂອງພວກເຮົາ ມີພຽງແຕ່ບໍ່ພໍເທົ່າໃດຫລັງຄາເຮືອນເທົ່ານັ້ນ ທີ່ຍ້າຍມາຈາກເຂດພິເສດໄຊສົມບູນ ແລະບ້ານໃກ້ຄຽງຈຳນວນໜຶ່ງ ແຕ່ມາຮອດດຽວນີ້ໄດ້ຂະຫຍາຍອອກເປັນບ້ານໃຫຍ່ ມີເຖິງ 96 ຄອບຄົວ, ຍ້ອນເຫັນແຈ້ງຕໍ່ແນວທາງນະໂຍບາຍ ຂອງພັກ-ລັດ ກ່ຽວກັບການຢຸດຕິການຖາງປ່າເຮັດໄຮ່ແບບເລື່ອນລອຍ ຫັນມາຈັດສັນອາຊີບແບບຄົງທີ່ ແລະຕັ້ງບ້ານເຮືອນແບບຖາວອນນັ້ນ ປະຊາຊົນພາຍໃນບ້ານໄດ້ຊອກທຸກເງື່ອນໄຂເພື່ອສັບຊາວ, ບຸກເບີກເນື້ອທີ່ດິນເປົ່າວ່າງ ໃຫ້ກາຍມາເປັນເນື້ອທີ່ນາທີ່ໃຫ້ຜົນຜະລິດເຂົ້າສູງກວ່າ ການເຮັດໄຮ່ຕັ້ງຫລາຍເທົ່າ. ມາຮອດດຽວນີ້ ຊາວບ້ານນ້ຳກະ ມີນາເຮັດເກືອບທຸກຄອບຄົວ ຖືວ່າແຕ່ລະປີມີເຂົ້າກຸ້ມກິນ ແລະບາງຄອບຄົວກໍເຫລືອກິນ.
ທ່ານ ນາຍບ້ານ ຍັງໄດ້ກ່າວຕື່ມວ່າ: ເພື່ອຊຸກຍູ້ໃຫ້ປະຊາຊົນປູກພືດພັນຕ່າງໆ ເປັນສິນຄ້ານັ້ນ ທາງບໍລິສັດ ຊັນລະບົບໄຟຟ້າແສງຕາເວັນ ໄດ້ ຮ່ວມມືກັບພະແນກພະລັງງານ ແລະບໍ່ແຮ່ ແຂວງຊຽງຂວາງ ໄດ້ມາປົວແປງເຂື່ອນໄຟຟ້ານ້ຳຕົກ ຂະໜາດນ້ອຍ (ນ້ຳກະ) ພ້ອມທັງໄດ້ຕິດຕັ້ງລະບົບໄຟຟ້າແສງຕາເວັນ ແລະເຄື່ອງຈັກໄຟຟ້າ ທີ່ແລ່ນດ້ວຍນ້ຳມັນໝາກເຍົາ ເສີມເຂົ້າຕື່ມເພື່ອໃຫ້ສາມາດສະໜອງກະແສໄຟຟ້າ ໃຫ້ປະຊາຊົນໄດ້ຊົມໃຊ້ຢ່າງພຽງພໍ ກັບຄວາມຕ້ອງການ, ບໍ່ພຽງແຕ່ເທົ່ານັ້ນ ທາງບໍລິສັດເພິ່ນຍັງໄດ້ສົ່ງເສີມປະຊາຊົນ ບ້ານນ້ຳກະ ປູກຕົ້ນໝາກເຍົາ ເຊິ່ງຈະໄດ້ນຳເອົາໝາກ ຂອງມັນມາບີບເປັນນ້ຳມັນໂອໄບດີເຊວ ເພື່ອໃຊ້ເປັນພະລັງງານທົດແທນອີກດ້ວຍ.
ນອກຈາກເຮັດນາເປັນອາຊີບຫລັກແລ້ວ ຊາວບ້ານນ້ຳກະ ຍັງໄດ້ລ້ຽງຄວາຍ 1.000 ກວ່າໂຕ; ນອກນີ້ ແຕ່ລະຄອບຄົວຍັງໄດ້ລ້ຽງໝູ ແລະສັດປີກອີກຈຳນວນໜຶ່ງ, ການຊອກຄົ້ນເຄື່ອງປ່າ ຂອງດົງທີ່ເປັນຢາເພື່ອນຳໃຊ້ຂາຍຕາມຕະຫລາດໃກ້ຄຽງ ກໍເປັນອີກຊ່ອງທາງໜຶ່ງ ທີ່ເຮັດໃຫ້ປະຊາຊົນມີລາຍໄດ້ເສີມຮັບໃຊ້ຄອບຄົວ ເພື່ອເຮັດໃຫ້ຊີວິດການເປັນຢູ່ດີຂຶ້ນເທື່ອລະກ້າວ.
ເບິ່ງສະພາບລວມແລ້ວ ເຫັນວ່າພີ່ນ້ອງເຜົ່າມົ້ງ ບ້ານນ້ຳກະ ມີຄວາມກະຕືລືລົ້ນຫລາຍ ຕໍ່ເຂື່ອນໄຟຟ້າແບບປະສົມປະສານ ຂອງບໍລິສັດ ຊັນລະບົບທີ່ໄດ້ເກີດຂຶ້ນຢູ່ຂອບເຂດບ້ານ ຂອງຕົນ ເຊິ່ງເຂົາເຈົ້າຕ່າງກໍເຊື່ອໝັ້ນວ່າ ມັນຈະຊ່ວຍເຮັດໃຫ້ຊີວິດການເປັນຢູ່ ຂອງຕົນດີຂຶ້ນເປັນກ້າວໆ ເຊິ່ງອັນຕົ້ນຕໍ ເຂົາເຈົ້າໄດ້ມີນາເຮັດ, ມີອາຊີບຄົງທີ່, ມີເຮືອນຢູ່ທີ່ໝັ້ນຄົງຖາວອນ, ມີລົດໄຖນາ, ມີລົດບັນທຸກ, ລົດໂດຍສານປະຈຳບ້ານ, ມີຕູ້ເຢັນ, ໂທລະພາບ ແລະເຄື່ອງໃຊ້ ຂອງສອຍປະຈຳເຮືອນ ສິ່ງສຳຄັນອີກອັນໜຶ່ງ ບັນດາລູກຮັກຫລານແພງ ຂອງປະຊາຊົນພາຍໃນບ້ານ ໄດ້ມີໂອກາດຮ່ຳຮຽນໜັງສືຢ່າງທົ່ວເຖິງ.
ມາເຖິງປະຈຸບັນພີ່ນ້ອງເຜົ່າມົ້ງ ບ້ານນ້ຳກະ ບໍ່ພຽງແຕ່ມີຊີວິດການເປັນຢູ່ ແລະວັດທະນະທຳທີ່ດີແລ້ວ, ເຂົາເຈົ້າຍັງໄດ້ດຳລົງຊີວິດຢູ່ໃນຄວາມສະຫງົບອຸ່ນອຽນ, ອັນນີ້ກໍຍ້ອນວ່າ ແຕ່ລະຄອບຄົວມີຄວາມຢູ່ດີກິນດີ ແລະມີຄວາມສາມັກຄີຮັກແພງກັນ; ພ້ອມກັນເຂົ້າຮ່ວມວຽກງານປ້ອງກັນຊາດ-ປ້ອງກັນຄວາມສະຫງົບ ເພື່ອປົກປັກຮັກສາບ້ານຊ່ອງ ແລະທັບມ້າງກົນອຸບາຍ ການເຄື່ອນໄຫວ ຂອງພວກຄົນບໍ່ດີໃຫ້ໝົດໄປຢ່າງສິ້ນເຊີງ.
|
