ໄດ້ແລ້ວ10ຄົນຜູ້ເຂົ້າຮອບແຂ່ງຂັນຮ້ອງເພງຢີ່ປຸ່ນ
* ຮອບຄັດເລືອກການແຂ່ງຂັນຮ້ອງເພງຍີ່ປຸ່ນຄັ້ງທຳອິດ, ໃນວັນເສົາທີ່ຜ່ານມານີ້ ທີ່ສູນຮ່ວມມື ລາວ-ຍີ່ປຸ່ນ ມະຫາວິທະຍາໄລແຫ່ງຊາດ (ວິທະຍາເຂດດົງໂດກ) ສາ ມາດຄັດເລືອກໄດ້ແລ້ວ 10 ຄົນ ຜູ້ເຂົ້າຮອບຊີງຊະນະເລີດຈາກຜູ້ເຂົ້າຮ່ວມແຂ່ງຂັນທັງໝົດ 36 ຄົນ, ໂດຍຮອບຊີງຊະນະເລີດຈະໄດ້ຈັດຂຶ້ນ ໃນວັນເສົາທີ 3 ພະຈິກ 2007 ທີ່ຈະເຖິງນີ້ ທີ່ສູນການຄ້າລາວ-ໄອເຕັກ ນະຄອນຫລວງວຽງຈັນ; ທັງນີ້ ກໍເພື່ອສົ່ງເສີມການຮຽນຮູ້ ແລະນຳໃຊ້ພາສາຍີ່ປຸ່ນ ຂອງນັກສຶກສາ ລາວທີ່ພວມຮຽນພາສາຍີ່ປຸ່ນ ໃຫ້ຖືກ ຕ້ອງ, ເປັນການສົ່ງເສີມ ແລະແລກປ່ຽນວັດທະນະທຳລາວ-ຍີ່ປຸ່ນ ດ້ວຍກັນ ເພື່ອເຮັດແນວໃດໃຫ້ນັກສຶກສາລາວກໍຄືຍີ່ປຸ່ນ ໄດ້ຮັບຮູ້ ແລະເຂົ້າເຖິງທາງດ້ານວັດທະນະທຳອັນດີງາມຂອງສອງປະເທດຢ່າງແທ້ຈິງ. ສຳລັບເງື່ອນໄຂຜູ້ເຂົ້າຮ່ວມແຂ່ງຂັນໃນເທື່ອນີ້ ແມ່ນຕ້ອງເປັນ ຄົນສັນຊາດລາວ, ອາຍຸບໍ່ເກີນ 15- 35 ປີ (ບໍ່ຈຳກັດເພດ), ບໍ່ແມ່ນນັກຮ້ອງອາຊີບ (ຮູ້ພາສາຍີ່ປຸ່ນຍິ່ງເປັນການດີ), ຮ້ອງດ່ຽວ ຫລືເປັນກຸ່ມບໍ່ເກີນ 6 ຄົນ, ເລືອກເພງດ້ວຍຕົນເອງ ຖ້າບໍ່ມີແມ່ນສາມາດເລືອກ ແລະອັດເອົາໄດ້ທີ່ສູນລາວ-ຍີ່ປຸ່ນ, ຜູ້ຊະນະເລີດອັນດັບທີ 1 ຈະໄດ້ຮັບເຄື່ອງສຽງ, ອັນດັບສອງ ກີຕາໄຟ ແລະອັນດັບ 3 ຈະໄດ້ຮັບໄມ້ ຫລືກິຕາໂປງ./.
