ໂມເດິນ ແດ໊ນ... ແຮງຂ້າມປີ
ເຖິງວ່າລະບຳເພງຊຸດທຳອິດ “ໂມເດິນ ແດ໊ນ ແຟນຕາຊີ (Modern Dance Fantasy) ” ຂອງກຸ່ມສິລະປິນນັກເຕັ້ນສຽງດີ “ໂມເດິນ ແດ໊ນ” ຈາກບໍລິສັດ ອິນດີ ເຣັກຄອດ ໄດ້ເປີດຕົວເມື່ອຕົ້ນເດືອນ ກັນຍາ ປີຜ່ານມາ, ແຕ່ກະແສຄວາມແຮງຂອງຫລາຍໆບົດເພງໃນອາລະບຳ ກໍ່ຍັງໄດ້ຮັບການຖາມເຂົ້າມາຕະຫລອດໃນລາຍການເພງທາງໂທລະ ພາບ ແລະ ວິທະຍຸກະຈາຍສຽງຄື້ນຕ່າງໆໂດຍສະເພາະເພງ ຟ້າຜ່າ ແລະ ເວລານາທີ... ໂມເດິນແດ໊ນ: “ພວກເຮົາຮູ້ສຶກດີໃຈ ແລະ ພູມໃຈຫລາຍ ທີ່ທັງສອງເພງ ໄດ້ຮັບການຕອບຮັບເປັນຢ່າງດີ, ນ້ອງໆ ແຟນເພງ ກໍ່ໃຫ້ການຕ້ອນຮັບດີ ບໍ່ວ່າຈະໄປສະແດງຢູ່ໃສ ພວກເຂົາກໍ່ຈະຕິດຕາມໄປໃຫ້ກຳລັງໃຈ ແລະ ຮ້ອງເພງໄດ້ເກືອບທຸກເພງເຊັ່ນ ເພງ ສົ່ງໃຈ, ທີ່ສຸດ, ຟ້າຜ່າ ແລະ ເວລານາທີ, ຂໍຂອບໃຈຫລາຍໆທີ່ໃຫ້ການສະຫນັບສະຫນູນຕະຫລອດມາ. ເພງຊຸດນີ້ມີຫລາຍຮູບແບບເພື່ອໃຫ້ຜູ້ຟັງໄດ້ຟັງຫລາກຫລາຍແນວເພງມີທັງ ລັອກ, ປ໋ອບ, ຮິບຮອບ ແລະ ຊຶ້ງໆ, ນອກຈາກພວກເຮົາແລ້ວ ກໍ່ຍັງມີເອື້ອຍ ອາລູນາ ຊ່ວຍຮຽບຮຽງ, ມີ L.O.G ຊ່ວຍແຕ່ງເພງ ແລະ ມີ ເຊວ. ສ່ວນການແຕ່ງກາຍ ເອກະລັກແມ່ນແປກ, ຮົກ ບໍ່ຄືໃຜ ຢາກໃຫ້ໄວຫນຸ່ມລາວມີການແຕ່ງຕົວຫລາຍຂຶ້ນ, ແຕ່ໃຫ້ຢູ່ໃນກົດເກນຂອງສັງຄົມ”. ຄອນເສີດ ຂອງໂມເດິນ ແດ໊ນ: “ຄອນເສີດສ່ວນໃຫຍ່ ຈະຖືກເຊີນໄປຮ່ວມສະແດງເຊັ່ນງານຂອງ ແທງໂກ, ເບຍລາວ...ເຄີຍໄປທົວຄອນເສີດຢູ່ 3 ແຂວງພາກໃຕ້ ສະຫວັນນະເຂດ, ຈຳປາສັກ ແລະ ທ່າແຂກ, ສ່ວນພາກເຫນືອ ແມ່ນແຂວງອຸດົມໄຊ. ສ່ວນຄອນເສີດໃຫຍ່ ຄາດວ່າ ເດືອນມັງກອນ ປີ 2007 ນີ້ເຊິ່ງເປັນງານຂອງ ຄ້າຍ ອິນດີ ເຣັກຄອດ. ສຳລັບຄອນເສີດຢູ່ຕ່າງແດນ ພວກເຮົາກໍ່ຖືກທາບທາມມາເຊັ່ນກັນ, ແຕ່ປະເທດບ້ານໃກ້ເຮືອນຄຽງກໍ່ເຄີຍໄປມາແລ້ວ 2 ເທື່ອຢູ່ ຫນອງຄາຍ (ໄທ), ເຫັນພວກເອື້ອຍ ອ້າຍ ໃນສັງກັດດຽວກັນໄປ ກໍ່ດີໃຈ ແລະ ພວກເຮົາກໍຢາກໄປສະແດງໃຫ້ເພື່ອນບ້ານເຫັນວ່າ ບ້ານເຮົາກໍ່ມີການພັດທະນາດ້ານວົງການບັນເທີງເຊັ່ນກັນ”. ເວົ້າເຖິງແຟນຄລັບ: “Fan Club ຫນ້າຮັກຫລາຍ, ສ່ວນໃຫຍ່ຈະເປັນນ້ອງໆນັກຮຽນມັດທະຍົມ ແຕ່ຮຸ້ນດຽວກັບພວກເຮົາກໍ່ມີເຊັ່ນກັນ, ເວລາພວກເຮົາໄປໃສ ພວກເຂົາເຈົ້າກໍ່ຈະຕິດຕາມໄປເຊຍໃຫ້ກຳລັງໃຈ, ບາງເທື່ອກໍ່ຈະໂທຫາ ເພື່ອຢາກຮູ້ຂ່າວຄາວ ແລະ ຂໍ້ມູນໃຫມ່ກ່ຽວກັບພວກເຮົາ, ດັ່ງນັ້ນ ພວກເຮົາຈຶ່ງຢາກເຮັດ ເວບ ໄຊ ຫນຶ່ງຂຶ້ນມາ”. ຮູ້ສຶກແນວໃດ ກ່ຽວກັບວົງການເພງສະຕິງໃນບ້ານເຮົາ: “ດີໃຈທີ່ບ້ານເຮົາເປີດກວ້າງ, ເປີດໂອກາດໃຫ້ໄວຫນຸ່ມໄດ້ສະແດງອອກ ເພາະໄວຫນຸ່ມລາວຕ້ອງການສະຖານທີ່ໃຫ້ເຂົາເຈົ້າເປີດໃຈ ຢາກເຮັດ ແຕ່ບໍ່ມີໂອກາດ. ຢາກໃຫ້ສັງຄົມເບິ່ງເຫັນວ່າ ດຽວນີ້ ເພງສະຕິງກໍ່ບໍ່ໄດ້ລໍ້ແຫລມຈົນເກີນໄປ ມີຄວາມຫມາຍດີໆ ແລະ ຖືກໃຈໄວຫນຸ່ມ ດີກວ່າໃຫ້ໄປຊົມໃຊ້ເພງເພື່ອນບ້ານ ຫລື ຕ່າງປະເທດ, ສົນໃຈເພງລາວດີກວ່າ”. ຝາກວາຈາເຖິງແຟນເພງ: ໂດນາ ຊາຍ:ຂໍຝາກອະລະບຳຂອງພວກເຮົາດ້ວຍ, ພວກເຮົາຕັ້ງໃຈເຕັມທີ່ ບໍ່ຄາດຫວັງຫລາຍ ແຕ່ຂໍໃຫ້ຖືກໃຈກັບທຸກໆຄົນກໍ່ພໍ. ປຸ້ຍ: ຂໍຂອບໃຈ ສະປອດ ແມັກກາຊີນ ທີ່ເຮັດໃຫ້ພວກເຮົາໄດ້ມາສຳພາດ ເຊິ່ງຮູ້ສຶກດີທີ່ໄດ້ມາ ແລະ ຢ່າລືມໂມເດິນ ແດ໊ນ ເດີ້ ! ຕ້ອມ: ຂໍໃຫ້ນ້ອງໆນັກຮຽນ ຕັ້ງໃຈຮ່ຳຮຽນ ແລະ ເຊື່ອຟັງຄຳພໍ່ແມ່. ໂດນາ ຍິງ: ຂໍໃຫ້ປະເທດລາວຫມັ້ນຍືນ, ກ້າວໄປສູ່ລະດັບສາກົນ. ສຳລັບນ້ອງໆ ທີ່ສົນໃຈຢາກເປັນແບບພວກເຮົາທາງບໍລິສັດ ຍິນດີຕ້ອນຮັບເພື່ອສ້າງຝັນໃຫ້ທຸກຄົນ, ຈົ່ງກ້າສະແດງອອກ ແລະ ຫອບພອນສະຫວັນ ບວກພອນສະແຫວງມາຫາໂລດ ແລ້ວຈະເບິ່ງເຫັນເອງ. 4 ສະມາຊິກ ວົງ ໂມເດິນ ແດ໊ນ ນອກຈາກຕັ້ງໃຈກະທຳໃນຜົນງານເພງ ໃຫ້ດີທີ່ສຸດບໍ່ວ່າຈະເປັນການ ຮ້ອງ, ເຕັ້ນ, ການແຕ່ງກາຍທີ່ທັນສະໄຫມແລ້ວ, ພວກເຂົາຍັງຕັ້ງໃຈໃນການຮ່ຳຮຽນອີກດ້ວຍ...ຖ້າຢາກຮູ້ຈັກຜົນງານຂອງພວກເຂົາ ຫລາຍກວ່ານີ້ ກໍ່ໄປຫາຊື້ມາໄວ້ຟັງກໍແລ້ວກັນ !
