ເມືອງໜອງບົກ ບໍ່ບັນລຸຄາດໝາຍ​ເນື້ອທີ່ປູກເຂົ້ານາແຊງ ຍ້ອນຊົນລະປະທານບໍ່ພ້ອມ

*(ຂປລ): ທ່ານ ຂັນຕີ ໂພທິນ ເຈົ້າເມືອງໜອງບົກ ກ່າວວ່າ: ​ໃນ​ລະດູ​​ແລ້ງປີ​ນີ້, ຫ້ອງການກະສິກຳ-ປ່າໄມ້ ເມືອງໜອງບົກ ແຂວງຄຳມວ່ນ ​ໄດ້ວາງແຜນ ຈະປູກເຂົ້ານາແຊງໃຫ້ໄດ້ 3.200 ເຮັກຕາ, ແຕ່ມາຮອດປະຈຸບັນການກຽມດິນ, ການຕົກກ້າ ແລະ ປັກດຳທົ່ວເມືອງ ໄດ້ພຽງ​ແຕ່ 60% ຂອງເນື້ອທີ່, ເຊິ່ງຄາດ ວ່າເມືອງ ຈະບໍ່ສາມາດບັນລຸຄາດໝາຍແຜນການທີ່ກຳນົດໄວ້ ເນື່ອງຈາກຂາດງົບປະມານ ເພື່ອມາສ້ອມແປງລະບົບຊົນລະປະທານໃນແຕ່ລະຈຸດທີ່ ສຳຄັນ ປະມານ 25 ໂຄງການ.

ໃນລະດູຝົນ ຜ່ານມານີ້ ມີໂຄງການຊົນລະປະທານຫຼາຍແຫ່ງ ໃນເມືອງໜອງບົກ ເປ່ເພ ເສຍຫາຍ ເຊິ່ງເມືອງໄດ້ສະເໜີງົບປະມານຈຳນວນ 4,2 ຕື້ກີບ ແລະ ໄດ້ມາຈຳນວນ 1,2 ຕື້. ເງີນຈຳນວນດັ່ງກ່າວ ໄດ້ນຳໃຊ້ສ້ອມແປງຊົນລະປະທານຈຳນວນໜຶ່ງແລ້ວ ແຕ່ມີການລ່າຊ້າບໍ່ທ່ວງ ທັນກັບລະດູການຜະລິດຂອງ ຊາວນາ, ສາເຫດອີກບັນຫາໜຶ່ງຍ້ອນ​ນ້ຳເຊບັ້ງໄຟ ຢູ່ບາງເຂດ, ບາງບ້ານ ເປັນຕົ້ນຢູ່ເຂດບ້ານນາໄຕ້ນ້ຳເຊ ໄດ້ແຫ້ງເປັນຫາດຊາຍ ເປັນສາເຫດ​ເຮັດ​ໃຫ້ ການສະໜອງນ້ຳບໍ່ພຽງພໍ ໃນການຫົດເນື້ອທີ່ນາແຊງ ແລະ ພຶດພັນຕ່າງໆ.

ຢ່າງໃດກໍ່ຕາມ ທາງຫ້ອງການກະສິກຳ-ປ່າໄມ້ເມືອງ ຄາດວ່າ ຈາກບັນຫານ້ຳຊົນລະປະທານ ທີ່ບໍ່ສະດວກ ການປູກເຂົ້ານາແຊງ ແລະ ພືດປີນີ້ ຈະບັນລຸໄດ້ແຕ່ 200 ເຮັກຕາ ແລະ ພືດ 1.750 ເຮັກຕາເທົ່ານັ້ນ. ດ້ານການລຽ້ງສັດ ປີນີ້ ຢູ່ເມືອງໜອງບົກ ມີທ່າອ່ຽງຫລຸດລົງ ເນື່ອງຈາກລາຄາການຜະລິດສູງ, ລາຄາຕະຫຼາດ ຕ​ົກຕ່ຳ ເຮັດໃຫ້ຂະບວນລ້ຽງສັດ ປະເພດຕ່າງໆ ຫລຸດລົງ ຖ້າສົມທຽບໃສ່ປີ 2010 ທົ່ວເມືອງມີຟາມລ້ຽງໝູ 366 ຟາມ, ປີ 2011 ຍັງເຫືຼອພຽງ 36 ຟາມ, ມີໝູພໍ່ພັນ ແລະ ແມ່ພັນປະມານ 144 ໂຕ ແລະ ລ້ຽງຕາມຄອບຄົວ ປະມານ 20-30 ໂຕ, ເມືອງໜອງບົກ ມີຟາມໄກ່ 10 ຟາມ ມີໄກ່ປະມານ 7.000 ໂຕ, ຟາມເປັດ 1 ຟາມ ມີເປັດປະມານ 2.000 ໂຕ, ລ້ຽງປາໃນກະຊັງ ທັງໝົດ 4 ຈຸດ ສະເລ່ຍກະຊັງໜຶ່ງປະມານ 1.400 ໂຕ, ຟາມງົວ 2 ຟາມໆໜຶ່ງປະມານ 50 ໂຕ, ມີ 22 ຄອບຄົວ ລ້ຽງປາດຸກພັນຢູ່ເຂດບ້ານນາວາງ, ນ້ຳພຸ, ດົງກະສິນ, ຄອບຄົວລະ 1.200 ໂຕ./.

ກັບສາລະບານ