ລັດຖະບານອະນຸມັດເງິນ 500 ລ້ານກີບ ຊ່ວຍຜູ້ປ່ວຍອະຫິວາໃນແຂວງອັດຕະປື
*(ຂປລ): ລັດຖະບານໄດ້ອະນຸມັດເງິນ 500 ລ້ານກີບ ເພື່ອຊ່ວຍເຫລືອສຸກເສີນ ໃຫ້ແກ່ຜູ້ປ່ວຍພະ ຍາດອະຫິວາ ທີ່ມີການລະບາດໃນແຂວງອັດຕະປື ໃນຕົ້ນ ເດືອນ ນີ້ ສ່ວນອົງການອະນາໄມໂລກ ແລະ ອົງການສຸຂະ ພາບບໍ່ມີເຂດແດນ ກໍໄດ້ສະໜັບສະໜູນວຽກງານວິຊາກການ, ໜ່ວຍງານອາສາສະໝັກ, ນ້ຳດື່ມ ແລະ ຢາປິ່ນ ປົວພະຍາດ ໃຫ້ແກ່ເຈົ້າໜ້າທີ່ທ້ອງຖິ່ນເພີ່ມເຕີມ. ຂະນະນີ້ ການລະບາດຂອງພະຍາດດັ່ງກ່າວ ມີຍອດຜູ້ຕິດເຊື້ອເພີ່ມຂຶ້ນຈາກ 168 ຄົນມາເປັນ 187 ຄົນ ແຕ່ຈຳນວນຜູ້ເສຍຊີວິດນັ້ນ ຕົວເລກຍັງຢູ່ໃນລະດັບເດີມ 4 ຄົນ. ຕາມການເປີດເຜີຍຂອງ ທ່ານ ຈັນທະວົງ ໄຊຍະເສນາ, ຜູ້ປະຈຳການ ຮອງຫົວໜ້າຂະແໜງການສາ ທາລະນະສຸກ ແຂວງອັດຕະປື ໄດ້ລາຍງານຕໍ່ນັກຂ່າວ ຈາກ ສຳນັກຂ່າວສານປະເທດລາວ ໃນວັນທີ 29 ກໍລະກົດ 2010 ນີ້ວ່າ: ນັບແຕ່ມີການເກີດພະຍາອະຫິວາ ລະບາດໃນແຂວງອັດຕະປື ລະຫວ່າງວັນທີ 5 ກໍລະ ກົດຈົນຮອດປະຈຸບັນເຫັນວ່າ: ຍອດຜູ້ປ່ວຍ ຫລື ຜູ້ຕິດເຊື້ອໄດ້ເພີ່ມຂຶ້ນເຖິງ 187 ຄົນ ແລະ ແຜ່ລາມໄປຮອດ 15 ບ້ານ, ໃນນີ້ ຈຳນວນຜູ້ປ່ວຍ 175 ຄົນ ໄດ້ ຮັບ ການປິ່ນປົວຫາຍດີແລ້ວ ແລະ ໄດ້ສົ່ງກັບບ້ານເປັນທີ່ຮຽບຮ້ອຍ ຂະນະນີ້ ຍັງເຫລືອພຽງແຕ່ 12 ຄົນ ທີ່ຍັງຢູ່ໃນການຕິດຕາມ ແລະ ປິ່ນປົວຂອງ ເຈົ້າໜ້າທີ່ແພດ ຄາດວ່າອີກປະມານ 2-3 ວັນຕໍ່ໜ້າ ຈະຫາຍເປັນປົກກະຕິ. ແນວໃດກໍຕາມ ທ່ານ ຈັນທະວົງ ຍັງໄດ້ກ່າວວ່າ: ຍ້ອນຄວາມເປັນຫ່ວງເປັນໄຍຂອງລັດຖະບານ ຕໍ່ສະພາບທີ່ເກີດຂຶ້ນ ຊຶ່ງມາຮອດດຽວນີ້ ລັດຖະບານ ກໍຄື ອຳ ນາດການປົກຄອງແຂວງ ໄດ້ອະນຸມັດງົບປະມານສຸກເສີນຈຳນວນ500 ລ້ານກີບ ເພື່ອສະໜັບສະໜູນ ແລະ ຊ່ວຍສຳລັບການປະຕິບັດງານ ກ່ຽວກັບການ ຄວບ ຄຸມ ແລະ ຕິດຕາມພະຍາອະຫິວາ ບໍ່ໃຫ້ແຜ່ລາມໄປໃນເຂດອື່ນໆ. ນອກຈາກນັ້ນ ອົງການອະນາໄມໂລກ ກໍໄດ້ສົ່ງໜ່ວຍງານວິຊາການດ້ານ ການປິ່ນປົວພະຍາດ ນີ້ລົງພື້ນທີ່ ເພື່ອໃຫ້ຄຳປຶກສາ ແລະ ໃຫ້ການຝຶກອົບຮົມໜ່ວຍງານທ້ອງຖິ່ນໃຫ້ມີຄວາມເຂັ້ມແຂງ ສ່ວນອົງການສຸຂະພາບບໍ່ມີພົມແດນ ກໍໄດ້ລົງໄປເກັບກຳຂໍ້ມູນ ແລະ ສະ ໜອງນ້ຳ-ຢາປິ່ນປົວ ໃຫ້ເຈົ້າໜ້າທີ່ທ້ອງຖິ່ນເປັນທີ່ຮຽບຮ້ອຍແລ້ວ./.
ກັບສາລະບານ
