ແຜ່ນດິນໄຫວ ອິນໂດເນເຊຍ ແລະ ອິນເດຍ
(ຂປລ): ຕາມຂ່າວຕ່າງປະເທດ, ເຈົ້າໜ້າທີ່ ອິນໂດເນເຊຍ ແຈ້ງວ່າ: ມີຜູ້ເສຍຊີວິດແລ້ວ 3 ຄົນ, ບາດເຈັບ 45 ຄົນ ຈາກເຫດແຜ່ນດິນໄຫວຮຸນແຮງ ຢູ່ນອກແຄມຝັ່ງ ເກາະຊຸມບາວາ (ທາງພາກໃຕ້ຂອງປະເທດ ອິນໂດເນເຊຍ) ແລະ ຄາດການວ່າຈະມີຜູ້ເສຍຊີວິດ ແລະ ບາດເຈັບສູງກວ່ານີ້.
ແຜ່ນດິນໄຫວຄັ້ງທຳອິດ ວັດແທກຄວາມສັ່ນສະເທືອນໄດ້ 6,7 ຣິກເຕີ ເກີດຂຶ້ນຫ່າງຈາກເຂດ ບາວາ ໄປທາງພາກຕາເວັນຕົກສຽງເໜືອ 48 ກິໂລແມັດ ເມື່ອກາງຄືນວັນທີ 25 ພະຈິກທີ່ຜ່ານມາ, ຫລັງຈາກນັ້ນ 4 ຊົ່ວໂມງ ກໍ່ເກີດແຜ່ນດິນໄຫວອີກ ວັດແທກແຮງສັ່ນສະເທືອນໄດ້ 6,8 ຣິກເຕີ ໃນບໍລິເວນດຽວກັນ, ເຮັດໃຫ້ທາງການປະກາດເຕືອນໄພ ສືນາມິ ແຕ່ໄດ້ຍົກເລີກໃນເວລາຕໍ່ມາ. ເກາະ ຊຸມບາວາ ເປັນເກາະພູເຂົາໄຟ ມີນັກທ່ອງທ່ຽວໜ້ອຍກວ່າ ເກາະ ລອມບອກ ແລະ ເກາະບາຫລີ.
ຂະນະດຽວກັນ, ຕອນເຊົ້າມືດວັນທີ 26 ພະຈິກນີ້ ກໍເກີດແຜ່ນດິນໄຫວແທກຄວາມແຮງສັ່ນສະເທືອນໄດ້ 6,0 ຣິກເຕີ ຢູ່ນອກແຄມຝັ່ງເກາະ ສຸມາຕຣາ, ຫ່າງຈາກເຂດ ມູໂກມູໂກ ເມືອງ ເບງກູລູ ໄປທາງຕາເວັນຕົກສຽງໃຕ້ 100 ກິໂລແມັດ ຫລັງຈາກເມື່ອວັນທີ 25 ພະຈິກ ຫາກໍເກີດແຜ່ນດິນໄຫວສາມາດແທກໄດ້ 6,2 ຣິກເຕີ ໃນບໍລິເວນດຽວກັນ.
ສ່ວນທີ່ປະເທດ ອິນເດຍ , ແຜ່ນດິນໄຫວເກີດຂຶ້ນເມື່ອເວລາ 6 ໂມງ 13 ນາທີ ຂອງວັນທີ 26 ພະຈິກນີ້ ໂດຍມີສູນກາງຢູ່ໃນພື້ນທີ່ ລະຫວ່າງ ນະຄອນຫລວງ ນິວ ແດນລີ ກັບລັດຍາຫາ. ສຳນັກອຸຕຸນິຍົມວິທະຍາ ຂອງອິນເດຍ ລາຍງານວ່າ: ແຜ່ນດິນໄຫວຄັ້ງນີ້ ມີຂະໜາດ 4,3 ຣິກເຕີ, ແຮງສັ່ນສະເທືອນ ເຮັດໃຫ້ຜູ້ຄົນຕື່ນຈາກບ່ອນນອນ ແລະ ແລ່ນອອກໄປຫາບ່ອນເປົ່າຫ່ວາງ ແລະ ສະຖານີໂທລະພາບ ອິນເດຍລາຍງານວ່າ ຍັງບໍ່ມີລາຍງານຄວາມເສຍຫາຍ./.
ກັບສາລະບານ |
