ຫຼຽນຄຳແມ່ນຄວາມມຸ້ງຫວັງຂອງທີມເຕະບານຫວຽດນາມໃນຊີເກມ24
ກິລາເຕະບານແມ່ນກິລາ ຍອດນິຍົມໃນລາຍການກິລາໃຫຍ່ໆ ບໍ່ວ່າໃນທະວີບເອີຣົບ, ອາຊີ ກໍຄືບັນດາປະເທດຕ່າງໆທົ່ວໂລກ ດັ່ງດຽວ ກັນກັບ ມະຫະກຳກິລາແຫ່ງອາຊີ ຫຼື ຊີເກມ ຂອງບັນດາປະເທດໃນທະວີບ ອາຊີ ເຊິ່ງປະເທດໃດໆກໍຫວັງສ້າງໃຫ້ໄດ້ຜົນງານອັນໂດດເດັ່ນ ເພື່ອຍາດເອົາຂັນຊະນະເລີດມາຄອງ; ປະຈຸບັນ ຍັງເຫລືອເວລາເກືອບ 2 ເດືອນ ການແຂ່ງຂັນກິລາຊີເກມ ຄັ້ງທີ 24 ກໍຈະໄດ້ເປີດຂຶ້ນຢ່າງເປັນທາງການ ຢູ່ ທີ່ນະຄອນລາຊະສິມາ ລາຊະອານາ ຈັກໄທ ເຊິ່ງມີຫລາຍໆປະເພດກິລາ ຂອງຫຼາຍໆປະເທດໄດ້ມີການກະ ກຽມເພື່ອສົ່ງນັກກິລາເຂົ້າຮ່ວມ ໂດຍ ສະເພາະທີມກິລາເຕະບານ ສສ. ຫວຽດນາມ ທີ່ກຽມເຂົ້າຮ່ວມແຂ່ງຂັນ ກໍໄດ້ຕັ້ງຄວາມຫວັງເອົາສູງສຸດ ນັ້ນຄື ຫລຽນຄຳ ເຊິ່ງຄູຝຶກເຕະບານທີມຊາດຫວຽດນາມ ທ່ານ ຣິເອວ (Riedl) ຊາວອີຕາລີ ໄດ້ໃຫ້ສຳພາດ ຕໍ່ນັກຂ່າວກິລາຫວຽດນາມວ່າ: “ຄວາມຫວັງ” ຂອງທີມເຕະບານຊາດຫວຽດນາມ ແມ່ນ ເຂົ້າຮອບກ່ອນ ຮອງຊະນະເລີດ ຫລື 4 ທີມສຸດທ້າຍ ໃນ ກິລາຊີເກມ ຄັ້ງທີ 24 ທີ່ ປະເທດໄທ, ເຖິງແມ່ນວ່າ ໃນຕົວຈິງ ທ່ານ ຣິເອວ ກໍມີຄວາມຫວັງອັນແຮງກ້າກ່ອນໝົດອາຍຸສັນຍາ ການຄຸມທີມເຕະບານບານຫວຽດນາມ ນັ້ນກໍຄື ນຳພາທີມຊາດເຕະບານຫວຽດນາມ ຍາດເອົາຂັນຊະນະເລີດມາຄອງ ພາຍຫລັງ ພາດໂອກາດມາຫລາຍຄັ້ງ. ຄູຝຶກເຕະບານຫວຽດນາມ ໃຫ້ຮູ້ວ່າ: “ອີງໃສ່ຜົນງານ ຂອງທີມເຕະບານຫວຽດນາມ ໃນລາຍ ການເຕະບານລາຍການໃຫຍ່ຢູ່ ໄຕ້ຫວັນ ສປ. ຈີນ ແມ່ນຫລິ້ນໄດ້ຢ່າງປະທັບໃຈຫລາຍ ທາງດ້ານເຕັກນິກ ກໍຄືພະລະກຳລັງ. ສ່ວນຕໍ່ກັບທີມເຕະບານຂອງປະເທດໄທ ເຊິ່ງເປັນເຈົ້າຂອງແຊ໋ມ ຊີເກມ , ທີມເຕະບານ ລຸ້ນອາຍຸບໍ່ເກີນ 23 ປີ ຫຼື U23 ຊາດໄທ ເຖິງແມ່ນເຕັມໄປດ້ວຍປະສົບການໃນການລົງສະໜາມແຂ່ງຂັນ ລາຍການໃຫຍ່ກໍຕາມ, ແຕ່ ນັດທີ່ຂ້ອຍ ໄປນະຄອນຫລວງ ບາງກອກ ຕິດຕາມການແຂ່ງຂັນເຕະບານນັດມິດຕະພາບລະຫວ່າງ ທີມຊາດໄທ ແລະ ສ. ອາຣັບເອເມີເຣດ ເຫັນວ່າ ທີມເຕະບານໄທນຳໃຊ້ຜູ້ຫລິ້ນ ລົງສະໜາມ ຄົນໜຸ່ມນ້ອຍມີໜ້ອຍທີ່ສຸດ. ໃນທີມເຕະບານແຫ່ງ ຊາດທີ່ລົງສະໜາມແຂ່ງຂັນ ໃນຄັ້ງນັ້ນ ແມ່ນລຸ້ນລາວຄາວດຽວກັບ ກຽດຕິສັກ ແລະ ນັກກິລາຄົນອື່ນໆ. ອາດເວົ້າໄດ້ວ່າ ມາຮອດປະຈຸບັນ, ທີມເຕະບານ U 23 ໄທ ເປັນທີມທີ່ໜ້າຢຳເກງ ກ່ອນໝູ່ໃນຫລາຍທີມ. ຈາກນັ້ນ ກໍແມ່ນທີມເຕະບານ ສິງກະໂປ, ອິນໂດເນເຊຍ, ມາເລເຊຍ ຊຶ່ງຍັງເປັນອີກເວລາປະມານ ເກືອບສອງເດືອນ ກິລາ ຊີເກມຈະເລີ່ມຕົ້ນເປີດການແຂ່ງຂັນ ແລະ ທຸກບັນຫາ ອາດມີການປ່ຽນແປງໄດ້ , ເຖິງວ່າພວກເຮົາໄດ້ກະກຽມດີ , ມີບາງກໍລະນີ ອາດຈະມີການບາດເຈັບກອ່ນລົງແຂ່ງຂັນກໍໄດ້”.
ທ່ານ ຣິເອວ ຍັງໄດ້ກ່າວເຖິງແຕ່ລະທີມເຕະບານ ວ່າອາດຈະມີການພິກລັອກຂຶ້ນໄດ້ກໍມີ , ແຕ່ໂດຍລວມ ເມື່ອຫລິ້ນຢູ່ເດີ່ນແຂກ ທີມເຕະບານ U 23 ຫວຽດນາມ ແນ່ນອນອາດຈະເອົາຊະນະ ສິງກະໂປ, ອິນໂດເນເຊຍ ໄດ້ ຊຶ່ງຂ້ອຍເຊື່ອແນ່ວ່າ ທີມເຕະບານ ຫວຽດນາມ ຈະພົບກັບທີມເຕະບານໄທ 50/50 ໃນຮອບກ່ອນຮອງຊະນະເລີດ . ຖ້າປີນີ້ ການແຂ່ງຂັນຊີເກມ ບໍ່ໄດ້ຈັດຂຶ້ນທີ່ປະເທດໄທ ຂ້ອຍເຊື່ອແນ່ວ່າ ຈະນຳພາທີມເຕະບານຫວຽດນາມໄປສູ່ຮອບຊີງຊະນະເລີດໃຫ້ໄດ້ , ນັ້ນກໍຄືບັນດາທ່ານຮັບຮູ້ແລ້ວວ່າ: ຢູ່ປະເທດໃດກໍແລ້ວແຕ່ ເຈົ້າພາບລ້ວນແຕ່ ໄດ້ປຽບສູງ. ເຖິງທີມເຕະບານ U23 ຫວຽດນາມອາດຈະເສຍປຽບ ທາງດ້ານສະໜາມແຂ່ງຂັນ, ແຕ່ຖ້າ ກຳມະການຕັດສິນຢ່າງຍຸຕິທຳ , ຂ້ອຍກໍເຊື່ອໝັ້ນວ່າຈະພາທີມເຕະບານ U23 ຫວຽດນາມໄປສູ່ຈຸດສູງສຸດນັ້ນ ຄື ເອົາຫລຽນຄຳຊີເກມ ມາຄອງ.
ກັບສາລະບານກິລາ
ກັບຫນາ້ພາສາລາວ
ຂ່າວສານປະເທດລາວ (ຂປລ) - 80 ຖະໜົນ ເສດຖາທິລາດ, ວຽງຈັນ ສ ປ ປ ລາວ- ໂທ. (856-21) 21 5402, 21 2447- ແຟັກ 21 2446
