ເຕະບານຊິງຂັນພະນພທ່ານນາຍົກລັດຖະມົນຕີເຂົ້າຮອບ8ທີມສຸດທ້າຍ
* ມາເຖິງປະຈຸບັນ ການແຂ່ງຂັນ ເຕະບານຊີງຂັນ ພະນະທ່ານນາຍົກລັດຖະມົນຕີແຫ່ງ ສປປລາວ ຄັ້ງທີ IV ປີ 2007 ເພື່ອເປັນການສະເຫລີມສະຫລອງ ການສ້າງຕັ້ງ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 32 ປີ ແລະ ທັງເປັນການພັດທະນາວົງການ ກິລາເຕະບານ ລາວໃຫ້ນັບມື້ນັບມີຄຸນນະພາບດີຂຶ້ນ, ກຽມປັດໄຈກ້າວສູ່ການເປັນເຈົ້າພາບຊີ ເກມ 2009 ຢ່າງສຳເລັດຜົນດີນັ້ນ ພວມດຳເນີນໄປດ້ວຍບັນຍາກາດອັນຄຶກຄື້ນ ແລະມີຄວາມໝາຍ, ຫລາຍໆທີມເຕະບານ ກໍສາມາດເອົາຊະນະຄູ່ຕໍ່ສູ້ ເຂົ້າສູ່ຮອບ II ໄດ້ຢ່າງສຳເລັດຜົນດີ. ທ່ານ ກະເສມ ອິນທິລາດ ປະທານສະຫະພັນເຕະບານແຫ່ງຊາດລາວ ໄດ້ຈັດຖະແຫລງຂ່າວ ກ່ຽວກັບ ການແຂ່ງຂັນເຕະບານຊີງຂັນພະນະທ່ານ ນາຍົກລັດຖະມົນຕີ ຕໍ່ສື່ມວນຊົນທຸກຂະແໜງການຊາບເມື່ອທ້າຍອາທິດຜ່ານມານີ້ ທີ່ສະຫະພັນເຕະບານແຫ່ງຊາດຫ້ວຍຫົງ ນະຄອນຫລວງວຽງ ຈັນວ່າ:ການແຂ່ງຂັນແຂ່ງຂັນເຕະບານ ຊີງຂັນພະນະທ່ານນາຍົກ ໃນຄັ້ງນີ້ເພື່ອເປັນການປຸກລະດົມຂະບວນການເຕະບານຂອງ ສປປລາວໃນຂອບເຂດທົ່ວປະເທດ ໂດຍພວກເຮົາຈະຈັດເປັນ 2 ບັ້ນ, ບັ້ນໜຶ່ງແມ່ນ ແມ່ນເປັນການຄັດເລືອກ ຢູ່ໃນເຂດຕ່າງໆ ເຊິ່ງພວກເຮົາໄດ້ແບ່ງເປັນ 5 ເຂດຄື: ເຂດທີ I ພາກເໜືອ ມີ ແຂວງ ອຸດົມໄຊ ເປັນເຈົ້າພາບໃນນີ້ປະກອບມີ 4 ແຂວງ ຄື ແຂວງ ອຸດົມໄຊ, ຫລວງນ້ຳທາ, ບໍ່ແກ້ວ ແລະ ແຂວງ ຜົ້ງສາລີ. ເຂດ II ກໍແມ່ນພາກເໜືອເຊັນກັນມີ ແຂວງພະບາງ ເປັນເຈົ້າພາບ, ໄຊຍະບູລີ, ຊຽງຂວາງ ແລະ ຫົວພັນ. ນະຄອນຫລວງ ຈັນ ເຂດ III ເອົາລະດັບ ສາຍ ກ ມີ 8 ຄະນະ ຄື ກະຊວງ ຄົມມະນາຄົມຂົນສົ່ງໄປສະນີ ແລະ ກໍ່ ສ້າງ, ວິທະຍາໄລລາວ ອາເມລິກາ, ກະຊວງປ້ອງກັນຊາດ, ກະຊວງປ້ອງກັນຄວາມສະຫງົບ, ສະໂມສອນມຸນເດີໄນ, ກະຊວງຖະແຫລງຂ່າວ ແລະ ວັດທະນະທຳ, ນະຄອນຫລວງ ແລະ ທະນາຄານ. ເຂດ IV ມີ 3 ແຂວງ ໂດຍແມ່ນແຂວງບໍລິຄຳໄຊ ເປັນເຈົ້າພາບ. ຢູ່ໃນເຂດ 4 ເຊິ່ງ ປະກອບມີ ແຂວງຄຳມ່ວນ ແລະ ສະຫວັນນະເຂດ.ເຂດນີ້ຂາດແຂວງວຽງຈັນ ເພາະຍັງຢູ່ໃນໄລຍະຫ້າມລົງແຂ່ງຂັນເປັນເວລາ 2 ປີ; ເນື່ອງຈາກຄັ້ງຜ່ານມາ ທີມນີ້ບໍ່ໄດ້ແຂ່ງ ຂັນສຸດກົກສຸດປາຍ. ເຂດພາກໃຕ້ ຈະມີແຂວງອັດຕະປືເປັນເຈົ້າພາບ, ຈຳປາສັກ ແລະ ແຂວງສາລາວັນ. ພາຍຫລັງແຂ່ງຂັນຮອບຄັດເລືອກເປັນທີ່ຮຽບຮ້ອຍແລ້ວ ຈະມາແຂ່ງຂັນໃນຮອບທີ II ຢູ່ນະຄອນຫລວງວຽງຈັນ ເລີ່ມຕັ້ງແຕ່ ວັນທີ 20 ເຖິງ ວັນທີ 30 ພະຈິກ ເປັນມື້ຊີງຊະນະເລີດ ຊຶ່ງຈະໄດ້ແບ່ງເປັນ ສອງສາຍແຂ່ງຂັນພົບກັນໝົດ ສາຍລະ 4 ທີມ ໂດຍຈະເອົາ 4 ທີມຂອງນະຄອນຫລວງ ຢູ່ຄົນລະສາຍ ໂດຍ ເອົາ ວິທະຍາໄລ ລາວ ອາເມລິກາຢູ່ ສາຍ 1 ແລະ ນະຄອນຫລວງຢູ່ ອີກສາຍໜຶ່ງ; ຈາກນັ້ນ ຈະເລືອກເອົາທິມ ທີ່ມີຄະແນນດີ ອີກ ສອງທີມ ຊັບຊ້ອນໃນແຕ່ລະສາຍ ແລະ ຈະເອົາຜູ້ຊະນະເລີດບັນດາແຂວງຕ່າງໆທີ່ຄັດເລືອກມາໄດ້ນັ້ນ ໄປຈົກສະຫລາກໃສ່ຢູ່ໃນສອງສາຍນີ້ ແລະ ຈະແຂ່ງຂັນແບບພົບກັນໝົດເລືອກເອົາທີມມີຄະແນນດີ ເຂົ້າສູ່ຮອບກ່ອນຮອງຊະນະເລີດ. ສຳລັບໃນຮອບເຂົ້າສູ່ ຊີງຊະນະເລີດນັ້ນ ຈະເອົາທີ I ຂອງສາຍ ກ ມາແຂ່ງຂັນກັບ ທີ II ຂອງສາຍ ຂ ແລະ ເອົາ ທີ I ຂອງສາຍ ຂ ມາແຂ່ງຂັນ ກັບ ທີ II ຂອງສາຍ ກ ແລະ ການແຂ່ງຂັນໃນ ປີນີ້ ຈະແຕກຕ່າງກັບປີຜ່ານມາ ຄື: ການແຂ່ງຂັນແມ່ນພວກເຮົາເປີດ ກວ້າງເອົາລະດັບບັນດານັກກິລາທີ່ມີສີມືຕ່າງໆ ແລະ ກໍສາມາດເອົານັກກິລາຕ່າງປະເທດເຂົ້າຮ່ວມແຂ່ງຂັນໄດ້ 5 ຄົນ ໃນແຕ່ລະນັດ ແມ່ນລົງສະໜາມໄດ້ 3 ຄົນ ແລະ ຢູ່ຕ່າງແຂວງກໍສາມາດເອົານັກກິລາຢູ່ແຂວງ ແລະ ເຂດຂອງເຂົາເຈົ້າເຂົ້າມາປະສານສົມທົບໄດ້ ເພື່ອມາ ແຂ່ງຂັນຢູ່ນະຄອນຫລວງ. ເພື່ອເພີ່ມສີສັນໃຫ້ການແຂ່ງຂັນ ເຕັມໄປດ້ວຍ ເຕັກນິກ ກໍຄືຄຸນນະພາບໃໝ່. ສຳລັບຕໍ່ກັບງົບປະມານໃນການໃຊ້ຈ່າຍເຂົ້າໃນການແຂ່ງຂັນຄັ້ງນີ້ ທ່ານ ບຸນກັນ ກຸນລະບຸດ ຫົວໜ້າການຕະຫລາດບໍລິສັດເບຍລາວໄດ້ກ່າວວ່າ: ການແຂ່ງຂັນໃນຄັ້ງນີ້ ພວກເຮົາໄດ້ຈັດ ອອກເປັນແຕ່ລະພາກ ແລະ ກໍໄດ້ເພີ່ມເງິນລາງວັນໃຫ້ແກ່ ທີມທີ່ເຂົ້າຮ່ວມການແຂ່ງຂັນ ພ້ອມທັງມີການຈັດກິດຈະກຳ ມອບໂຊກໃຫ້ແກ່ຜູ້ຖືກທວາຍຜົນການແຂ່ງຂັນ ຄາດວ່າ ລາງວັນທີ່ I ຈະເປັນຄຳ ມີນ້ຳໜັກ 5 ບາດ ແລະລາງວັນອື່ນໆ. ຕໍ່ກັບການແຂ່ງຂັນ ພວກເຮົາໄດ້ສະໜັບສະໜູນປະມານ ເຖິງ 700 ລ້ານກີບ; ນັບຕັ້ງແຕ່ລາຍຈ່າຍ ການແຂ່ງຂັນໃນຮອບຄັດເລືອກຈົນເຖິງຮອບຊີງຊະນະເລີດ ຊຶ່ງມາເຖິງປະຈຸບັນ ການແຂ່ງຂັນໃນຮອບທຳອິດ ໃນຫລາຍ ພາກກໍໄດ້ແຂ່ງຂັນສຳເລັດເປັນທີ່ ຮຽບຮ້ອຍ; ໃນນີ້ ເຂດ III ເອົາລະດັບສາຍ ກ ທີມເຕະບານ ນະຄອນຫລວງວຽງ ເອົາຊະນະ ທີມເຕະບານ ກ/ຊ ຖະແຫລ່ງຂ່າວ ແລະ ວັດທະນະທຳ ດ້ວຍການຍິງລູກຈຸດໂທດ , ລາວ-ອາເມລິກາ ຊະນະ ມຸນເດີໄນ 2/1; ກ/ຊ ຄຂປກ ຊະນະ ກອງທັບ 2/1 ແລະ ທີມເຕະບານ ທະນາຄານ ເອົາຊະນະ ກ/ຊ ປ້ອງກັນຄວາມສະຫງົບ 1/ 0 . ສ່ວນ ຢູ່ ເຂດພາກເໜືອ ແຂວງ ອຸດົມໄຊ ແລະ ຫລວງພະບາງ ກໍໄດ້ເຂົ້າສູ່ ຮອບ 8 ທີມສຸດທ້າຍ ແລະ ອີກໃນສອງພາກ ຈະນຳຜົນມາແຈ້ງໃຫ້ຊາບຕາມພາຍຫລັງ. ການແຂ່ງຂັນໃນຮອບ 8 ທີມສຸດທ້າຍຈັດຂຶ້ນ ໃນລະຫວ່າງວັນ 20 -30 ຕຸລາ 2007 ທີ່ ສະໜາມກິລາແຫ່ງຊາດນະຄອນຫລວງວຽງຈັນ.
