FBT ໄດ້ສະຫນັບສະຫນູນ ສຕລ
* ບໍລິສັດ ໂຮງງານ ຟຸດບອນໄທ ສະປອດຕິງກູສ ຈຳກັດ (FBT) ໄດ້ສະຫນັບສະຫນູນ ສະຫະພັນ ບານເຕະແຫ່ງຊາດ (ສຕລ) ດ້ານອຸປະກອນການແຂ່ງຂັນ ແລະ ເຄື່ອງນຸ່ງ ລວມມູນຄ່າເກືອບ 20 ລ້ານກີບ ໃນເວລາ 4 ປີ. ພິທີເຊັນສັນຍາການຊ່ວຍເຫລືອດັ່ງກ່າວ ໄດ້ຈັດຂຶ້ນໃນທ້າຍອາທິດຜ່ານມາຢູ່ສຕລ ລະຫວ່າງ ທ່ານ ພູວັນ ວົງສຸດທິ ປະທານສະຫະພັນບານເຕະແຫ່ງຊາດລາວ ແລະ ທ່ານ ມົນໄຊ ໂຊກໄພບູນກິດ ຜູ້ອຳນວຍການ ບໍລິສັດ FBT ໂດຍໃນສັນຍາ, FBT ຈະຊ່ວຍເຫລືອ ນັກກິລາບານເຕະທີມຊາດລາວທັງຊາຍ ແລະ ຍິງ ທຸກລຸ້ນ ລວມເຖິງກຳມະການຕັດສິນ ເຊັ່ນ: ຊຸດແຂ່ງຂັນ ແລະ ຊຸດຝຶກແອບ, ບານເຕະ, ກະເປົ໋າ...ສຳລັບຜົນປະໂຫຍດ ທີ່ FBT ໄດ້ຮັບນັ້ນກໍຄືສາມາດນຳ ເອົາສັນຍະ ລັກບໍລິສັດຕົນມາໂຄສະນາຢູ່ສະຫນາມແຂ່ງຂັນໄດ້,ສາມາດນຳເອົານັກກິລາທີມຊາດ ໄປແຂ່ງຂັນ ປີລະ 3 ເທື່ອ ເພື່ອເປັນການໂຄສະນາ ປະຊາ ສຳ ພັນ ໃຫ້ແກ່ບໍລິສັດລວມທັງສິດພິເສດອື່ນໆອີກຈຳນວນຫນຶ່ງ. ເອສຣາ ພິກຊະນະ ຄຂປກ 3-2 ເຖິງວ່າ ເອສຣາ ຖືກ ຄຂປກ ນຳໄປກ່ອນເຖິງ 2 ປະຕູ,ແຕ່ກໍສາມາດແກ້ເກມການຫລິ້ນ ຈຶ່ງພິກມາຊະນະ ຄູ່ແຂ່ງສຳເລັດ 3-2 ໃນການແຂ່ງຂັນບານເຕະປະຈຳປີ ຫລື ລາວລີກ ທ້າຍອາທິດຜ່ານມາ. ວັນທີ 27 ມີນາ 2010, ຢູ່ສະ ຫນາມກິລາເຈົ້າອະນຸວົງ ທີມ ເອສຣາ ພົບ ຄຂປກ ເຊິ່ງໃນເບື້ອງ ຕົ້ນ ທີມ ຄຂປກ ຫລິ້ນໄດ້ດີ ແລະ ມີ ເກມບຸກທີ່ເຫນືອກວ່າ, ພຽງ 2 ນາທີ ກອງຫນ້າຄົນເກັ່ງ ຄື ລຳເນົາ ສິງໂຕ ກໍຍິງປະຕູໃຫ້ແກ່ທີມ ຂຶ້ນນຳ 1-0 ແລະ ໃນນາທີທີ 2 ລຳເນົາ ກໍຍິງປະຕູທີ 2 ໃຫ້ທີມ ໜີຫ່າງເປັນ 2-0.ເມື່ອ ເສຍ ເຖິງ 2 ປະຕູ,ຄູຝຶກຂອງ ເອສຣາ ຈຶ່ງປ່ຽນຜູ້ຫລິ້ນ ໂດຍເອົານັກເຕະບານກອງຫນ້າ ແລະ ກອງຫລັງຈາກ ສ.ເກົາຫລີ ລົງຫລິ້ນ ຈຶ່ງເຮັດໃຫ້ເກມ ການບຸກດີຂຶ້ນ ແລະ ໄດ້ປະຕູສຳເລັດ ໃນນາທີທີ 34 ຈາກ ໂສພາ ໄລ່ມາເປັນ 1-2 ແລະກ່ອນຈະໝົດເວລາເຄິ່ງເວລາ ທຳອິດຄືນາທີໆ 45,ຄອນສະຫວັນ ຍິງປະຕູໄດ້ສົ່ງຜົນ ໃຫ້ສະເຫມີກັນ 2-2.ເຄິ່ງເວລາທີ 2 ,ພຽງ 1 ນາທີ ຄອນສະຫວັນ ກໍຍິງປະຕູໃຫ້ແກ່ ເອສຣາ ພິກຊະນະ ຄຂປກ ສຳເລັດ.ກ່ອນຈະຈົບການແຂ່ງ ທີມ ຄຂປກ ຖືກ ກອງເຊຍກົດດັນຈຶ່ງ ເຮັດໃຫ້ ລຳເນົາ ສິງໂຕ ແລ່ນອອກຈາກສະຫນາມ ເພື່ອໄປຖຽງກອງເຊຍ. ຄູ່ທີ 2 ປກສ ຊະນະ ຊິຕີກ໊ອບປີເຊັນເຕີ 2-0 ຈາກການຍິງຂອງ ສົມບັດ ໃນນາທີທີ 2 ແລະ 15. ວັນທີ 28 ມີນາ ກອງທັບ ຊະນະ ວິທະຍາໄລ ລາວ-ອາເມລິກາ 2-0 ຈາກການຍິງຂອງ ກີຕາ ໃນນາທີທີ 12 ແລະ ອຸດາວອນ ໃນນາ ທີ ທີ 40.ສ່ວນຄູ່ທີ 2 ທີ່ ແຂ່ງຂັນຢູ່ສະຫນາມກິລາແຫ່ງຊາດ ທະນາຄານ ຊະນະ ນະຄອນຫລວງ 2-1. /.
ກັບສາລະບານ
