ບັນດາແຂວງພາກເໜືອຫາລືຄວາມຄືບຫນ້າການຮ່ວມມືລາວ-ອາຊຽນ
*(ຂປລ): ກະຊວງການຕ່າງປະເທດຮ່ວມກັບແຂວງຊຽງຂວາງ ໄດ້ຈັດກອງປະຊຸມສຳມະນາສຳລັບພະນັກງານທີ່ເຮັດ ວຽກພົວ ພັນ ຕ່າງປະເທດ 6 ແຂວງພາກເໜືອ ເພື່ອຄົ້ນຄວ້າປຶກສາຫາລືຄວາມຄືບໜ້າ ດ້ານການຮ່ວມມື ແລະ ຜົນປະໂຫຍດຂອງ ສປປ ລາວ ໃນການເຊື່ອມໂຍງ ເຂົ້າກັບອາຊຽນ. ກອງປະຊຸມໄດ້ຈັດໃຫ້ມີຂຶ້ນໃນອາທິດຜ່ານມາຢູ່ທີ່ແຂວງຊຽງຂວາງ ພາຍໃຕ້ການເປັນປະທານ ຂອງ ທ່ານ ໄຊຍະການ ສຸລິວົງ, ເອກ ອັກຄະລັດຖະທູດປະຈຳກະຊວງການຕ່າງປະເທດ, ທ່ານ ສຸບັນ ສົມປະສົງ, ກຳມະການພັກແຂວງ, ຫົວໜ້າຫ້ອງວ່າການ ປົກຄອງ ແຂວງ ແລະ ມີບັນດາຫ້ອງການພົວພັນຕ່າງປະເທດ, ຫ້ອງວ່າການປົກຄອງແຂວງ, ພະແນກແຜນການແລະການລົງທຶນ ແລະ ພະ ແນກທ່ອງທ່ຽວ ຈາກ 6 ແຂວງພາກເໜືອຄື: ຫົວພັນ, ອຸດົມໄຊ, ຜົ້ງສາລີ, ຫລວງນ້ຳທາ, ຫລວງພະບາງ ແລະ ຊຽງຂວາງ ເຂົ້າຮ່ວມ, ຊຶ່ງກອງປະຊຸມ ໄດ້ຮັບຟັງການລາຍງານ ສະພາບການພົ້ນເດັ່ນຂອງສາກົນ ກໍຄືພາຍໃນ ສປປ ລາວ ໃນໄລຍະໜຶ່ງປີຜ່ານມາ, ຮັບ ຟັງຄຳຄິດເຫັນ ເພື່ອເປັນຂໍ້ມູນ ແລະ ທັດສະນະ ຂອງບັນດາແຂວງພາກເໜືອ ກ່ຽວກັບການເຊື່ອມໂຍງ ຂອງ ສປປ ລາວ ໃນດ້ານ ຕ່າງໆ ກັບບັນດາປະເທດອາຊຽນ. ພ້ອມນີ້ ກໍໄດ້ຮັບຟັງຂໍ້ສະເໜີດ້ານຄວາມສະດວກ ແລະ ຂໍ້ຫຍຸ້ງຍາກຂອງແຕ່ລະແຂວງ, ໃນນີ້ສິ່ງ ສຳຄັນ ແມ່ນການສ້າງໂອກາດໃຫ້ບັນດາແຂວງພາກເໜືອ ໄດ້ພົບປະແລກປ່ຽນບົດຮຽນຊຶ່ງກັນ ແລະ ກັນ ເພື່ອເປັນຂໍ້ມູນສຳຄັນ ກຽມໃຫ້ແກ່ກອງປະຊຸມໃຫຍ່ ວຽກງານການເຊື່ອມໂຍງ ກັບອາຊຽນ ຊຶ່ງຈະຈັດໃຫ້ມີຂຶ້ນ ໃນຕົ້ນເດືອນມັງກອນ 2009 ຢູ່ທີ່ແຂວງ ຫລວງພະບາງ. ກອງປະຊຸມລັກສະນະດັ່ງກ່າວ ໄດ້ຈັດຂຶ້ນມາກ່ອນແລ້ວເມື່ອຕົ້ນເດືອນພະຈິກ ສຳຫລັບບັນດາແຂວງພາກກາງ ແລະ ພາກໃຕ້./.
ກັບສາລະບານ
