ຈະຂະຫຍາຍເພີ່ມໂຄງການຈັດສັນປ່າຜະລິດໄປຍັງ 5 ແຂວງ
*(ຂປລ): ໂຄງການຈັດສັນປ່າຜະລິດ ແລະ ພັດທະນາຊົນນະບົດ (SUFORD) ຂອງກະຊວງກະສິກຳ ແລະ ປ່າໄມ້ ຊຶ່ງໄດ້ເລີ່ມ ຈັດຕັ້ງປະຕິບັດ ໄລຍະທຳອິດ ເປັນເວລາ 4 ປີ ນັບແຕ່ສົກປີ 2004-2008 ທີ່ກວມຢູ່ໃນ 4 ແຂວງ ຄຳມ່ວນ, ສະຫວັນນະເຂດ, ສາ ລະວັນ ແລະ ແຂວງຈຳປາສັກ ໄດ້ປະສົບກັບຄວາມສຳເລັດເປັນທີ່ໜ້າພໍໃຈ ແລະ ທາງໂຄງການຕົກລົງຈະສືບ ຕໍ່ໄລຍະສອງຕື່ມ ອີກໃນ 5 ແຂວງໃໝ່. ຜົນສຳເລັດດັ່ງກ່າວ ໄດ້ຖືກນຳສະເໜີລາຍງານ ຢູ່ໃນກອງປະຊຸມ ສະຫລຸບຕີລາຄາການຈັດຕັ້ງປະຕິບັດໂຄງການຈັດສັນປ່າຜະລິດ ແລະ ພັດທະນາຊົນນະບົດ ໄລຍະໜຶ່ງ,ຊຶ່ງຈັດຂຶ້ນ ໃນວັນທີ 19 ພະຈິກ ທີ່ນະຄອນຫລວງວຽງຈັນ, ພາຍໃຕ້ການເປັນປະທານ ຂອງ ທ່ານ ດຣ ຕີ ພົມມະສັກ, ລັດຖະມົນຕີຊ່ວຍວ່າການກະຊວງກະສິກຳ ແລະ ປ່າໄມ້, ທັງເປັນປະທານຄະນະຊີ້ນຳ ໂຄງການດັ່ງ ກ່າວຂັ້ນສູນກາງ, ມີບັນດາຮອງເຈົ້າແຂວງ ຈາກ 4 ແຂວງໂຄງການເກົ່າ ແລະ 5 ແຂວງໂຄງການໃໝ່ຄື: ອັດຕະປື, ເຊກອງ, ບໍລິຄຳ ໄຊ, ແຂວງວຽງຈັນ ແລະ ໄຊຍະບູລີ, ພ້ອມຄະນະຊີ້ນຳໂຄງການຂັ້ນແຂວງ ແລະ ຜູ້ຮັບຜິດຊອບພະແນກກະສິກຳ ປ່າໄມ້ບັນດາ ແຂວງດັ່ງກ່າວເຂົ້າຮ່ວມ, ຊຶ່ງທ່ານປະທານກອງປະຊຸມ ໄດ້ໃຫ້ຂໍ້ສັງເກດວ່າ: ກອງປະຊຸມຄັ້ງນີ້ ຈັດຂຶ້ນບົນພຶ້ນຖານຄວາມສຳເລັດ ການ ປະຕິບັດວຽກງານຕົວຈິງ ຢູ່ໃນ 4 ແຂວງເກົ່າ ແລະ ຢູ່ໃນໄລຍະຍາດແຍ່ງກາຊ່ວຍເຫລືອຈາກສາກົນ ເພື່ອຂະຫຍາຍບົດຮຽນ ຂອງໂຄງການ ອອກໄປສູ່ເຂດປ່າຜະລິດ ອື່ນໆ ໃນ 5 ແຂວງໃໝ່ທີ່ກ່າວມາ, ຊຶ່ງກວມເອົາປ່າຜະລິດ 8 ແຫ່ງ, 18 ເມືອງ, 330 ບ້ານ, ນອນໃນເນື້ອທີ່ທັງໝົດ 630.000 ເຮັກຕາ. ໂຄງການຈັດສັນປ່າຜະລິດ ແລະ ພັດທະນາຊົນນະບົດ ເປັນໂຄງການທີ່ປະກອບສ່ວນໃນການຈັດຕັ້ງປະຕິບັດ 4 ເປົ້າໝາຍ ຂອງ ກະຊວງກະສິກຳ ແລະ ປ່າໄມ້ ກໍຄືນະໂຍບາຍຂອງລັດຖະບານເປັນຕົ້ນແມ່ນ: ການຄຸ້ມຄອງປ່າໄມ້ແບບຍືນນານ, ການຊຸກຍູ້ການ ຜະ ລິດເປັນສິນຄ້າ, ຢຸດຕິການຖາງປ່າເຮັດໄຮ່ແບບສິ້ນເຊີງ ແລະ ການພັດທະນາຊີວິດການເປັນຢູ່ຂອງ ປະຊາຊົນບັນ ດາເຜົ່າ ໃນເຂດໂຄງການ. ນອກນັ້ນຍັງໄດ້ປະກອບສ່ວນຕໍ່ການພັດທະນາເສດຖະກິດ-ສັງຄົມ ຢູ່ໃນແຕ່ລະແຂວງທີ່ກ່ຽວຂ້ອງ ໂດຍສະ ເພາະ ແມ່ນໃນໄລຍະສາມປີຕໍ່ໜ້າ ໂຄງການດັ່ງກ່າວຈະກວມເອົາ 5 ແຂວງຕື່ມອີກ ຊຶ່ງລວມແລ້ວຮອດປີ 2011, ໂຄງການຈະເຮັດ ສຳ ເລັດກິດຈະກຳຕ່າງໆທີ່ພົວພັນກັບການຈັດສັນປ່າຜະລິດແບບຍືນນານ ແລະ ພັດທະນາຊີວິດການເປັນຢູ່ຂອງປະຊາຊົນ ຢູ່ໃນ 9 ແຂວງ, 36 ເມືອງ ແລະ 740 ບ້ານ ເທົ່າກັບ 32% ຂອງພຶ້ນທີ່ປ່າຜະລິດທັງໝົດ. ມາຮອດປະຈຸບັນໂຄງການ ໄດ້ສ້າງຕັ້ງປ່າຜະ ລິດໄດ້ຈຳນວນ 37 ແຫ່ງ, ເນື້ອທີ່ 2,4 ລ້ານເຮັກຕາ; ປັບປຸງ ແລະ ພັດທະນາລະບຽບການ, ນິຕິກຳ, ຄູ່ມື ແລະ ເຕັກນິກຕ່າງໆທີ່ ສອດ ຄ່ອງເອື້ອອຳນວຍໃຫ້ແກ່ການຄຸ້ມຄອງປ່າໄມ້ແບບຍືນນານ. ທ່ານ ລັດຖະມົນຕີ ຊ່ວຍວ່າການກະຊວງກະສິກຳ ແລະ ປ່າໄມ້ ໄດ້ຕີລາຄາວ່າ: ໂຄງການນີ້ມີຄວາມຄືບໜ້າ ແລະ ມີປະສິດທິຜົນດີ ແຕ່ກໍ່ເປັນພຽງ ການຈັດຕັ້ງປະຕິບັດໃນເຂດປ່າຜະລິດ 8 ແຫ່ງ ໃນ 4 ແຂວງເທົ່ານັ້ນ ແຕ່ບໍ່ທັນຕອບສະໜອງຄວາມຮຽກຮ້ອງຕ້ອງການຂອງສັງຄົມໄດ້ເທື່ອ ດ້ວຍເຫດນັ້ນ ຈິງຮຽກຮ້ອງໃຫ້ທຸກພາກ ສ່ວນເປັນເຈົ້າການຈັດຕັ້ງປະຕິບັດໂຄງການໃຫ້ໄດ້ຮັບໝາກຜົນກວ່າເກົ່າ. ໂຄງການຈັດສັນປ່າຜະລິດ ແລະ ພັດທະນາຊົນນະບົດ ແມ່ນໂຄງການຮ່ວມມືຫລາຍຝ່າຍຄື: ລັດຖະບານ ສປປ ລາວ, ລັດຖະບານ ແຟັງລັງ ແລະ ທະນາຄານໂລກ ຊຶ່ງໄດ້ເລີ່ມສ້າງສັນຍາຮ່ວມມືກັນໃນເດືອນ9/2003 ແລະ ຖືກຮັບຮອງຢ່າງເປັນທາງການ ໃນວັນທີ 2/3/2004. ໂຄງການດັ່ງກ່າວມືທຶນທັງທັງໝົດ 16,5 ລ້ານໂດລາສະຫະລັດ, ໃນນີ້ທຶນຊ່ວຍເຫລືອຂອງລັດຖະບານແຟັງລັງ 6,1 ລ້ານໂດລາສະຫະລັດ, ທຶນຈາກທະນາຄານໂລກ 9,9 ລ້ານໂດລາສະຫະລັດ ແລະ ທຶນປະກອບສ່ວນຂອງລັດຖະບານ ສປປ ລາວ 0,53 ລ້ານໂດລາສະຫະລັດ ໂດຍມີກຳນົດການດຳເນີນງານແຕ່ເດືອນ 9/2003-12/2008./.
ກັບສາລະບານ
