ການທ່ອງທ່ຽວອຸດົມໄຊສ້າງເງື່ອນໄຂພັດທະນາທ້ອງຖິ່ນ
*(ຂປລ): ພະແນກທ່ອງທ່ຽວແຂວງອຸດົມໄຊ ໄດ້ສັງເກດຕີລາຄາການຈັດຕັ້ງປະຕິບັດວຽກງານທ່ອງທ່ຽວໃນທົ່ວແຂວງຊຶ່ງ ເຫັນວ່າທີ່ຜ່ານມາ ວຽກງານດັ່ງກ່າວໄດ້ຮັບການພັດທະນາ ແລະ ສົງເສີ່ມຢູ່ໃນທົ່ວສັງຄົມ ສາມາດເປັນທ່າແຮງ ແລະ ສ້າງເງື່ອນໄຂໃຫ້ແກ່ການພັດທະນາເສດຖະກິດ-ສັງຄົມ ກ້າວຂຶ້ນຢ່າງໜັກແໜ້ນ. ທັງນີ້ໄດ້ຮັບການຕີລາຄາຢູ່ໃນກອງປະຊຸມທວນຄືນວຽກງານທ່ອງທ່ຽວສົກປີ 2006-07 ແລະ ວາງທິດທາງແຜນການສົກປີ 2007-08 ຊຶ່ງຈັດຂຶ້ນໃນວັນທີ 9 ມິຖຸນາ 2008 ນີ້, ຢູ່ທີ່ຫ້ອງປະຊຸມພະແນກທ່ອງທ່ຽວແຂວງໂດຍເປັນປະທານຂອງທ່ານ ສີວັນ ບຸນສະຫວັດ, ຫົວໜ້າພະແນກທ່ອງທ່ຽວແຂວງອຸດົມໄຊ, ມີທ່ານ ສົມພົງ ມົງຄົນວິໄລ, ລັດຖະມົນຕີ, ປະທານອົງການທ່ອງທ່ຽວແຫ່ງຊາດ, ມີບັນດາຫົວຫນ້າພະແນກທ່ອງທ່ຽວຈາກບັນດາແຂວງພາກເໜືອ, ບັນດາເຈົ້າເມືອງ 7 ຕົວເມືອງອ້ອມຂ້າງແຂວງພ້ອມພະນັກງານພະແນກງານກ່ຽວຂ້ອງເຂົ້າຮ່ວມ. ໃນກອງປະຊຸມໄດ້ຮັບຟັງການສະຫລຸບຕີລາຄາການຈັດຕັ້ງປະຕິບັດແລະຖອດຖອນບົດຮຽນວຽກ ງານທ່ອງທ່ຽວພ້ອມກັບບັນດາແຂວງພາກເໜືອໃນສົກປີຜ່ານມາແລະຮັບຮອງເອົາແຜນການສົກປີ 2007-08 ລວມໄປເຖິງການສະເໜີຜ່ານໂຄງການພັດທະນາການທ່ອງທ່ຽວແບບຍືນຍົງຢູ່ແຂວງອຸດົມໄຊສຳລັບສົກປີ2008-2009. ທ່ານ ສົມພົງ ມົງຄົນວິໄລ ໄດ້ກ່າວເຖິງຄວາມສຳຄັນຂອງວຽກງານນີ້ ຊຶ່ງມັນຕິດພັນກັບຂະແໜງການອື່ນໆທີ່ມີສ່ວນຮ່ວມ ເພາະວ່າປະຈຸບັນວຽກງານທ່ອງທ່ຽວມີບາດກ້າວຂະຫຍາຍຕົວ ແລະ ນັກທ່ອງທ່ຽວເຂົ້າມາທ່ອງທ່ຽວ ຢູ່ ສປປ ລາວ ແມ່ນນັບມື້ເພີ່ມຂຶ້ນເວົ້າລວມ, ເວົ້າສະເພາະຕົວເລກນັກທ່ອງທ່ຽວເຂົ້າມາທ່ຽວຢູ່ແຂວງອຸດົມໄຊ ກໍມີ ຈຳນວນເພີ່ມຂຶ້ນເຊັ່ນດ່ຽວກັນ. ສຳລັບສົກປີຜ່ານມາ, ມີນັກທ່ອງທ່ຽວມາທ່ຽວຢູ່ແຂວງອຸດົມໄຊເຖິງ 76.970 ຄົນ ໃນນັ້ນມີຄົນຕ່າງປະເທດ 52.410 ຄົນ, ສະເພາະເມືອງປາກແບງມີ 34.290 ຄົນ, ສ້າງລາຍຮັບເຂົ້າແຂວງເຖິງ 35 ຕື້ກີບ, ສ້າງລາຍການທ່ອງທ່ຽວແບບອະນຸລັກ ແລະ ໃຫ້ປະຊາຊົນເຂົ້າມາມີສ່ວນຮ່ວມເພີ່ມຂຶ້ນ ແລະ ດ້ານວຽກງານການປະກອບການອື່ນໆກໍ່ມີທ່ວງທ່າດີຂຶ້ນເຊັ່ນດຽວກັນ./.
ກັບສາລະບານ
