|
|
ຄວາມຊົງຈຳຖ້ຳພູແຄ
*ເນື່ອງໃນໂອກາດສະເຫລີມສະ ຫລອງວັນສ້າງຕັ້ງຂ່າວສານປະເທດລາວ (ຂປລ) ຄົບຮອບ 40 ປີ (ວັນທີ 6/1/1968-6/1/2008), ພວກເຮົາບໍ່ຄວນ ຫລົງລືມຖ້ຳພູແຄ ເມືອງວຽງໄຊ ແຂວງຫົວພັນ ຊຶ່ງເປັນບ່ອນກຳເນີດ ຂອງ ຂ່າວສານປະເທດ ລາວເລີ່ມຕົ້ນດ້ວຍການຈັດຕັ້ງ 3-4 ຫນ່ວຍງານໃຫຍ່ ຄື:
ຫນ່ວຍງານບົດ, ຫນ່ວຍຂ່າວ, ຫນ່ວຍພິມດີດລາຕິນລາວ, ພິມດີດພາສາລາວ ແລະ ຫນ່ວຍຄຸ້ມຄອງ ບໍລິຫານ. ເລີ່ມຕົ້ນດ້ວຍໃຊ້ເຄື່ອງມືທີ່ຫລ້າຫລັງ ກ້າວ ຂຶ້ນມານຳໃຊ້ເຄື່ອງທັນສະໄຫມເທື່ອລະກ້າວ. ຖ້ຳພູແຄແຫ່ງນີ້ ຂ້າພະເຈົ້າໄດ້ເຂົ້າມາຮ່ວມວຽກງານກັບສຳນັກຂ່າວສານປະເທດລາວ ໃນວັນທີ 15 ສິງຫາ 1969. ສະຖານ ທີ່ແຫ່ງນີ້ ເປັນບ່ອນຝຶກຝົນ ຫລໍ່ຫລອມ ໃຫ້ຂ້າພະເຈົ້າເຕີບໃຫຍ່ທັງທາງດ້ານຮ່າງກາຍແລະຈິດໃຈ, ຮຽນຮູ້ທຸກສິ່ງທຸກ
ຢ່າງ ນັບແຕ່ການເຮັດວຽກ, ປະຕິບັດຄຳສັ່ງ ແລະ ລະ ບຽບວິໄນຕ່າງໆ. ຂ່າວສານປະເທດ ລາວ ຕັ້ງຢູ່ຖ້ຳພູແຄ, ຢູ່ບ່ອນນັ້ນປະກອບມີຖ້ຳ 3 ຖ້ຳ ທີ່ ປ່ອງໃສ່ກັນ ຖ້ຳທີ 1 ແມ່ນຫນ່ວຍຄຸ້ມຄອງບໍລິຫານ ປະກອບມີ ແພດປະ
ຈຳກອງ, ເອື້ອຍລ້ຽງ, ສາງເບີກຈ່າຍເຂົ້າ ແລະເຄື່ອງຂອງອັດຕາກິນອື່ນໆ; ຖ້ຳທີ 2 ແມ່ນບ່ອນເຮັດວຽກຂອງທ່ານ
ສີຊະນະ ສີສານ ແລະ ເປັນບ່ອນ ຫລົບໄພ ເມື່ອເຮືອບິນມາເວີ່ນ ແລະ ຖ້ຳທີ 3 ແມ່ນຫລົບໄພຄືກັນ ທັງ 3
ຖ້ຳນີ້ຄັບແຄບຫລາຍ. ໃນຊຸມປີ 70 ໄດ້ຖືກສ້ອມແປງລະຫວ່າງຖ້ຳທີ 2 ແລະ ທີ 3 ປ່ອງໃສ່ກັນນັ້ນ ໃຫ້ບຸກເບີກໃຫ ້ກວ້າງອອກຕໍ່ມາໄດ້ຍົກຍ້າຍ ຫນ່ວຍໂທລະເລກ ແລະ ເຕເລຕິບ ເຂົ້າມາຢູ່ຖ້ຳບ່ອນດຽວກັນ, ຕໍ່ມາໄດ ້ຍຸບຫນ່ວຍພິມ ດີດລາຕິນລາວ ເຂົ້າກັບຫນ່ວຍໂທລະເລກຂ່າວແຈ້ງ ເພາະ ຜ່ານມາແມ່ນທຸກໆບົດ ແລະ ຂ່າວຕ້ອງຜ່ານການ ຕີພິມດີດພາສາລາຕິນ ລາວກ່ອນ ແລ້ວຈຶ່ງສົ່ງໄປໃຫ້ຫນ່ວຍໂທລະເລກ ສົ່ງຕໍ່ໄປໃຫ້ພາກກະຈາຍ ສຽງຂອງວິທະ ຍຸຝ່າຍປະເທດລາວ ທີ່ອາໄສຢູ່ຫວຽດນາມ (ເອີ້ນພາກ B1) . ພາກສ່ວນຫນ່ວຍບົດໃນເວລານັ້ນປະກອບມີ ພາກ
A1, A2, C1, C2, F5, F6, ບົດສົນທະນາລະຫວ່າງລຸງຮັກ ແລະ ລຸງຊາດ, ທ້າວຫລັກ ແລະ ທ້າວແຫລມ,
ນອກນັ້ນກໍມີບົດອ່ານຂ່າວຊ້າ ຂອງພະແນກໂຄ ສະນາອົບຮົມສູນກາງ ໃຫ້ທ້ອງ ຖິ່ນຕ່າງໆທົ່ວປະເທດ. ບັນດາ
ອ້າຍເອື້ອຍ ນ້ອງ ພະນັກງານຂ່າວສານທຸກຄົນ ເຮັດວຽກບໍ່ມີໂມງເວລາພັກ, ບໍ່ມີຫ້ອງການ, ບໍ່ມີເງິນເດືອນ ແຕ່ມີອັດ
ຕາກິນ, ປີຫນຶ່ງຜູ້ຊາຍໄດ້ຮັບ ສົ້ງເສື້ອ 2 ຊຸດ, ເກີບ 2 ຄູ່ ແລະ ແມ່ຍິງໄດ້ຮັບແພຕັດເສື້ອ 8 ແມັດ, ສິ້ນ ໂຮງງານກີ່ກະ
ຕຸກ 4 ຜືນ ພ້ອມສະບູຊັກເຄື່ອງ 1 ກ້ອນເທົ່ານັ້ນ.
ພວກເຮົາໄດ້ແບ່ງປັນກັນເປັນສີບເວນ ເພື່ອແບ່ງປັນວຽກງານສະດວກ, ທຸກເຊົ້າໄປເພີ່ມພູນຜະລິດຜົນ ເຮັດໄຮ່ເຂົ້າ,
ປູກມັນຕົ້ນ, ສາລີ ແລະ ສວນຄົວປູກຜັກ ເພື່ອຫາລ້ຽງກຸ້ມຕົນເອງ ເພາະປີຫນຶ່ງສູນກາງໄດ້ຕັດ ອັດຕາກິນ 3 ເດືອນ ເພື່ອໄປຊ່ວຍແນວຫນ້າ ໃນເວລານັ້ນ ບໍ່ວ່າສຳນັ ກງານອົງການໃດອ້ອມຂ້າງສູນກາງ ກໍໄດ້ປະຕິບັດຄຳຂວັນທີ່ວ່າ “ທຸກ
ສິ່ງທຸກຢ່າງເພື່ອແນວຫນ້າ; ທຸກສິ່ງທຸກຢ່າງເພື່ອຕີເອົາໄຊຊະນະ ຂ້າເສິກ ຜູ້ຮຸກຮານ”. ພະນັກງານຂ່າວ ສານໄລຍະນັ້ນ, ນອກຈາກເຮັດວຽກວິຊາສະ ເພາະແລ້ວ ຕອນແລງພາຍ ຫລັງກິນເຂົ້າແລງແລ້ວ ກໍພາກັນໄປຂຸດທາງ, ຜູ້ຂຸດ, ຜູ້ເຍືອງກະບັ້ງໄຕ້ໄຟ ພັດປ່ຽນກັນ, ຜູ້ຕີກອງຮ້ອງເພງ ມ່ວນຊື່ນຟົດຟື້ນ ຈົນລືມຄວາມອິດເມື່ອຍ ຮອດ 9 ໂມງຈຶ່ງໄດ້ກັບ.
ປີ 1971 ເພື່ອຮັບໃຊ້ໃຫ້ແກ່ການບຸກໂຈມຕີເອົາໄຊຊະນະຈາກຂ້າເສິກຜູ້ຮຸກຮານ, ບັນດາພວກອ້າຍນັກຂ່າວ ແລະ ຫນ່ວຍໂທລະເລກໄດ້ແບ່ງປັນກັນລົງປະຈຳຕາມທ້ອງຖິ່ນເຂດສະ ຫນາມຮົບ ເຊັ່ນ ທາງພາກໃຕ້, ພາກເຫນືອ ແລະ ເຂດຊຽງຂວາງ ເພາະໃນເວລານັ້ນ ຈັກກະພັດ ອາເມລິກາຜູ້ຮຸກຮານ ພາຍຫລັງປະລາໄຊບັ້ນຮົບກູ້ກຽດແລະ ໄດ້ເປີດບັ້ນຮົບໂອເດແອນຂຶ້ນ ເພື່ອໂຈມຕີຍາດເອົາເຂດປົດປ່ອຍຂອງກຳລັງຮັກຊາດ, ພາກໃຕ້ກໍແມ່ນບັ້ນຮົບ ລາມ
ເຊີນ 719 ຊຶ່ງແມ່ນພວກຫຸ່ນໄຊງ່ອນ ສົມທົບກັບກອງ ທັບແຫ່ງຊາດວຽງຈັນເວລານັ້ນ ບຸກໂຈມຕີຫວັງຕັດເສັ້ນທາງລະ
ຫວ່າງ ພາກໃຕ້ຂອງລາວ ແລະ ພາກໃຕ້ຫວຽດນາມ ແລະ ບັ້ນບຸກໂຈມຕີເຂດຍາດແຍ່ງປາກຊ່ອງດົງບໍລິເວນ ແລະ ອື່ນໆ. ນອກຈາກການສົ່ງບົດ ແລະ ຂ່າວໃຫ້ B1 ແລ້ວ ຍັງສົ່ງໃຫ້ຂ່າວ ສານຫວຽດນາມອີກ. ມື້ໃດອາກາດດີ ກໍເຮັດວຽກສະ ດວກດີແລ້ວໄວ ຖ້າມື້ໃດອາກາດບໍ່ດີ ຮັບ-ສົ່ງຂ່າວກໍພົບຄວາມຫຍຸ້ງຍາກ.
ທ້າຍປີ 1972 ສະພາບການໄດ້ປ່ຽນແປງ, ສູນກາງໄດ້ມີຄຳສັ່ງໃຫ້ອ້າຍນ້ອງໄປເຮັດວຽກຢູ່ວຽງຈັນ,ໃນເວລານັ້ນຝ່າຍວຽງຈັນ ແລະ ຝ່າຍແນວລາວຮັກຊາດໄດ້ເປີດການເຈ ລະຈາເພື່ອສ້າງຄວາມປອງດອງຊາດຢຸດຕິສົງຄາມ. ໃນທີ່ສຸດ ວັນທີ 21 ກຸມພາ 1973 ຝ່າຍແນວລາວຮັກຊາດ ແລະ ຝ່າຍວຽງຈັນ ກໍຕົກລົງກັນເຊັນສັນຍາສັນຕິພາບ ທົ່ວປະເທດຢຸດຍິງ ແຕ່ລະຝ່າຍຢູ່ບ່ອນໃດກໍປັກທຸງຂອງຕົນຂຶ້ນໂລດ. ຫນ່ວຍໂທລະເລກ ແລະ ໂທລະພິມ ພວກເຮົາໄດ້ເຮັດວຽກ ທັງເວັນທັງຄືນ ເຮັດຈົນວຽກສຳເລັດ ຂ່າວຄາວກໍຫລາຍ ມາຈາກຫລວງພະບາງ ແລະ ວຽງຈັນ.
ພາຍຫລັງເຊັນສັນຍາສັນຕິພາບແລ້ວ, ຕໍ່ມາກໍເຊັນອະນຸສັນຍາ ກຳນົດເອົາຕົວເມືອງວຽງຈັນ ແລະ ເມືອງຫລວງພະບາງ ເປັນເມືອງເປັນກາງ, ຈັດຕັ້ງລັດຖະບານປະສົມສອງຝ່າຍເອົາກຳລັງທັງສອງຝ່າຍເຂົ້າປະສົມກັນ. ຫລັງຈາກນັ້ນ ກໍມີການຍົກຍ້າຍ ວິທະຍຸພາກ B1 ກັບຄືນມາຢູ່ພູແຄ ວຽກງານໄດ້ຫລຸດຜ່ອນເບົາລົງແດ່ ເພາະບໍ່ໄດ້ສົ່ງຂ່າວໃຫ້ B1 ມີແຕ່ສົ່ງ- ຮັບກັບຂ່າວສານຫວຽດນາມ. ເອື້ອຍ ທອງສີ ແລະ ອ້າຍມະນີວົງ ຮັບຜິດ ຊອບຕິດຕໍ່ກັບວຽງຈັນ, ສ່ວນຂ້າພະເຈົ້າ ຮັບຜິດຊອບຮັບ-ສົ່ງຂ່າວກັບຄະ ນະປະສົມຫລວງພະບາງ. ປີ 1975 ສະພາບການຂອງໂລກໄດ້ມີການປ່ຽນແປງ, ສະພາບການພາຍໃນປະເທດລາວເຮົາໄດ້ສຸກງອມ, ສູນກາງໄດ້ມີຄຳສັ່ງໃຫ້ກຽມຍົກຍ້າຍເຂົ້າວຽງຈັນ. ຂ່າວສານປະເທດລາວ ໄດ້ແບ່ງປັນພະນັກງານໄປພາກເຫນືອ, ພາກກາງ, ພາກໃຕ້ ແລະນະຄອນ ຫລວງວຽງຈັນ, ຂ້າພະເຈົ້າກໍໄດ້ຖືກຍົກຍ້າຍມາວຽງຈັນ ວັນທີ 18 ຕຸລາ 1975 ແລະ ກໍໄດ້ຮ່ວມວຽກງານກັບບັນດາພະນັກງານຂ່າວສານເຖິງປະຈຸບັນນີ້./.
ຂປລ ສະຫລອງວັນສ້າງຕັ້ງ ຄົບຮອບ40 ປີ
*(ຂປລ): ຕອນເຊົ້າຂອງວັນທີ 4 ມັງກອນ 2008 ສຳນັກຂ່າວສານປະເທດລາວ ( ຂປລ ) ໄດ້ຈັດຕັ້ງ ສະເຫລີມສະຫລອງວັນສ້າງຕັ້ງສຳນັກຂ່າວຂອງຕົນ ຄົບຮອບ 40 ປີ ( 6/1/1968-6/1/2008 ) ທນະຄອນ ຫລວງວຽງຈັນ ໂດຍມີ ທ່ານ ສຈ.ດຣ. ບໍ່ແສງຄຳ ວົງດາລາ, ລັດຖະມົນຕີຊ່ວຍວ່າການ ກະຊວງຖະແຫລງ ຂ່າວ ແລະ ວັດທະນະທຳ, ທ່ານ ຄຳແສນ ພົງສາ, ຫົວໜ້າສຳນັກຂ່າວສານປະເທດລາວ, ມີບັນດາຮອງຫົວໜ້າ ສຳນັກ, ບັນດາອະດີດຫົວໜ້າ ແລະ ຄະນະນຳ ສຳນັກຂ່າວສານປະເທດລາວ, ມີບັນດາພະນັກງານອາວຸໂສ, ບຳນານ ແລະ ຫົວໜ້າພະແນກ, ຮອງພະແນກ ຕະຫລອດຮອດພະນັກງານວິຊາການ ອ້ອມຂ້າງສຳນັກ ແລະ ແຂກທີ່ຖືກເຊີນ ເຂົ້າຮ່ວມ.
ໃນພິທີ ໄດ້ຮັບຟັງການລາຍງານໂດຍຫຍໍ້ ກ່ຽວກັບປະຫວັດຄວາມເປັນມາ, ການກຳເນີດ ເກີດຂຶ້ນ ແລະ ການເຕີບໃຫຍ່ຂະຫຍາຍຕົວ ຂອງສຳນັກຂ່າວສານປະເທດລາວ ຕະຫລອດໄລຍະ 40 ປີ ພ້ອມທັງແຜນ ການສູ້ຊົນໃນຊຸມປີຕໍ່ໜ້າ ຈາກທ່ານຫົວໜ້າສຳນັກຂ່າວສານແລ້ວ ຍັງໄດ້ມີການແລກປ່ຽນ ຄຳຄິດຄຳເຫັນ ແລະ ບົດຮຽນອັນສຳຄັນ ຈາກບັນດາທ່ານຜູ້ທີ່ມີປະສົບປະການ ທີ່ໄດ້ຜ່ານການຝຶກໃນຫລໍ່ຫລອມ ຈາກສຳ ນັກຂ່າວສານປະເທດລາວ ໃນໄລຍະຊຸມປີທຳອິດ ທີ່ປະເທດຊາດໄດ້ຮັບການປົດປ່ອຍ ຊຶ່ງໃນນີ້, ໄດ້ຍົກໃຫ້ເຫັນ ພາລະບົດບາດ ຄວາມສຳຄັນຂອງບັນດາສື່ ໃນການປະຕິບັດໜ້າທີ່ວຽກງານ ນຳເອົາແນວທາງນະໂຍບາຍ ຂອງພັກ ແລະ ແຜນການຂອງລັດ ລົງໄປສູ່ປະຊາຊົນບັນດາເຜົ່າ ໃນແຕ່ລະໄລຍະ ພ້ອມນີ້ຍັງໄດ້ຍົກໃຫ້ເຫັນ ບັນຫາການຄຸ້ມຄອງບໍລິຫານ ຊອກແຫລ່ງລາຍຮັບ ເພື່ອກຸ້ມຕົນເອງ ຫລຸດຜ່ອນການໃຊ້ຈ່າຍງົບປະມານ ຂອງລັດ ເທື່ອລະກ້າວ.
ຈາກນັ້ນ ທີ່ປະຊຸມຍັງໄດ້ຮັບຟັງການໂອ້ລົມ ຂອງທ່ານ ລັດຖະມົນຕີຊ່ວຍວ່າການກະຊວງຖ/ວ ສຈ. ດຣ. ບໍ່ແສງຄຳ ວົງດາລາ, ຊຶ່ງທ່ານໄດ້ຕາງໜ້າໃຫ້ຄະນະນຳຂອງກະຊວງ ຕີລາຄາສູງຜົນສຳເລັດອັນສຳຄັນ ຂອງພະນັກງານທົ່ວສຳນັກຂ່າວສານ ໃນແຕ່ລະລຸ້ນຄົນ ບໍ່ວ່າຈະຢູ່ໃນໄລຍະຕໍ່ສູ້ປົດປ່ອຍຊາດ ກໍຄືໄລຍະແຫ່ງ ການສ້າງສາປະເທດຊາດ ບັນດາພະນັກງານແຕ່ລະລຸ້ນໄດ້ພ້ອມກັນຕັດສິນໃຈບຸກບືນ ເຮັດສຳເລັດໜ້າທີ່ການ ເມືອງຂອງຕົນ ສາມາດຮັກສາໄດ້ບົດບາດ ຄວາມສຳຄັນ ໃນການເປັນຕົວແທນ ແລະ ປາກກະບອກສຽງ ຂອງປະເທດຊາດ ກໍຄືລັດຖະບານຕະຫລອດມາ ຊຶ່ງບາງຕອນສຳຄັນທ່ານໄດ້ກ່າວວ່າ: ຜົນງານຂອງສຳນັກ ຂປລ ໃນໄລຍະ 40 ປີ ແມ່ນມີມະຫາສານ ໂດຍສະເພາະແມ່ນ ໄດ້ປະກອບສ່ວນເຂົ້າໃນພາລະກິດປະຕິວັດ ໃນດ້ານການໂຄສະນາ ສື່ສານ ເພື່ອຕໍ່ສູ້ຕ້ານກັບສັດຕູທາງດ້ານແນວຄິດ ນັບແຕ່ສະໄໝຕໍ່ສູ້ປົດປ່ອຍຊາດ ໃນ ເມື່ອກ່ອນ ກໍຄື ປະກອບສ່ວນເຂົ້າໃນພາລະກິດ ປົກປັກຮັກສາ ແລະ ສ້າງສາພັດທະນາປະເທດຊາດ ໃນປະຈຸ ບັນ. ບໍ່ວ່າເວລາໃດ ສຳນັກຂ່າວສານປະເທດລາວ ກໍໄດ້ເສີມຂະຫຍາຍມູນເຊື້ອອັນເດັດດ່ຽວຂອງຕົນ ໃຫ້ກາຍ ເປັນອົງກອນນຳໜ້າຂອງສື່ ຕະຫລອດມາ ສົມກັບເປັນກະບອກສຽງຂອງລັດຖະບານ ຄືກັບບັນດາສຳນັກ ຂ່າວອື່ນໆຂອງຕ່າງປະເທດ. ພ້ອມນີ້ ທ່ານ ສຈ. ດຣ. ບໍ່ແສງຄຳ ວົງດາລາ ຍັງໄດ້ເນັ້ນໜັກ ໃຫ້ຄະນະນຳສຳ ນັກຂ່າວສານປະເທດລາວ ເພີ່ມທະວີຄວາມເອົາໃຈໃສ່ ການປະຕິບັດໜ້າທີ່ວຽກງານ ໃຫ້ມີຄວາມເຂັ້ມແຂງ ຂຶ້ນຕື່ມ, ໃນນັ້ນສິ່ງສຳຄັນ ແມ່ນການປັບປຸງແບບແຜນວິທີເຮັດວຽກ ຕາມຫລັກການລວມສູນປະຊາທິປະໄຕ ຕົກລົງເປັນໝູ່ຄະນະ ບຸກຄົນຮັບຜິດຊອບ ໄປພ້ອມກັບການສືບຕໍ່ ຍົກລະດັບທາງດ້ານເຕັກນິກ ວິຊາການ, ເຊີດຊູ ຄວາມຮັບຜິດຊອບໃຫ້ສູງຂຶ້ນ, ສູ້ຊົນຍົກລະດັບຄວາມຮັບຮູ້ ທາງດ້ານການເມືອງແນວຄິດໃຫ້ສູງ, ເຊີດຊູພາລະ ບົດບາດຂອງ ຂປລ ໃຫ້ເຂັ້ມແຂງ ແລະ ກາຍເປັນຜູ້ນຳໜ້າຂອງບັນດາສື່ຢູ່ພາຍໃນປະເທດ, ເພີ່ມທະວີຄວາມ ສາມັກຄີພາຍໃນສຳນັກໃຫ້ແໜ້ນແຟ້ນ, ພະຍາຍາມບືນຕົວ ໃນການສ້າງລາຍຮັບ ເພື່ອກຸ້ມຕົນເອງເທື່ອລະກ້າວ ເຮັດໃຫ້ຊີວິດການເປັນ ຢູ່ຂອງພະນັກງານ ໃນທົ່ວສຳນັກຂອງຕົນນັບມື້ດີຂຶ້ນ.
ຕອນຄ່ຳຂອງວັນດຽວກັນ ກໍໄດ້ຈັດງານລ້ຽງສັງສັນ ຢູ່ສຳນັກຂ່າວສານປະເທດລາວ ໂດຍມີທ່ານ ໝູນແກ້ວ ອໍລະບູນ, ລັດຖະ ມົນຕີວ່າການ ກະຊວງຖະແຫລງຂ່າວ ແລະ ວັດທະນະທຳ, ບັນດາພະນັກງານ ອາວຸໂສ ບຳນານ ຜູ້ທີ່ມີສ່ວນຮ່ວມ ໃນການສ້າງຕັ້ງ ຂປລ ນັບແຕ່ມມື້ກຳເນີດ ຈົນເຖິງປະຈຸບັນ ພ້ອມດ້ວຍບັນ ດາແຂກທີ່ຖືກເຊີນ ເຂົ້າຮ່ວມ./.
|
|
